ٹی 20 ٹیم میں محمد رضوان کی جگہ کوئی نہیں لے سکتا، کامران اکمل

لاہور (قدرت روزنامہ)کشمیر پریمیئر لیگ کی فرنچائز باغ اسٹالینز کے آئیکون پلیئر کامران اکمل کا کہنا ہے کہ محمد رضوان کی جگہ ٹی 20 ٹیم میں کوئی نہیں لے سکتا۔میڈیا سے گفتگو کرتے ہوئے کامران اکمل نے کہا کہ قومی کرکٹ ٹیم کے ٹی ٹوئنٹی ورلڈکپ اسکواڈ میں میری جگہ نہیں بنتی، اب اگر کوئی وکٹ کیپر بلے باز ٹی 20 کھیلے گا تو بطور اسپیشلسٹ بیٹر ہی کھیلے گا۔
انہوں نے کہا کہ ٹی ٹوئنٹی ورلڈ کپ میں یاری دوستی پر اسکواڈ منتخب نہیں کرنا چاہیے، آسٹریلیا کی کنڈیشنز کے لحاظ سے میرٹ پر اسکواڈ منتخب کرنا چاہیے۔
کامران اکمل کا کہنا ہے کہ کشمیر پریمیئر لیگ کے لیے شائقین کرکٹ بہت پرجوش دکھائی دے رہے ہیں، ایونٹ میں اچھی کرکٹ کھیل کر ٹورنامنٹ کے معیار کو بہتر کرنا ہے۔ان کا کہنا ہے کہ ہر اننگز میں ستر اسی رنز بنانا آسان نہیں کیوں کہ کرکٹ باتوں سے نہیں کھیلی جاتی، اچھی کرکٹ کھیلنے کے لیے گراؤنڈ میں محنت درکار ہوتی ہے۔
باغ اسٹالینز کے آئیکون پلیئر نے کہا کہ کشمیر پریمیئر لیگ لوکل نوجوان کھلاڑیوں کے لیے اپنے آپ کو منوانے کا بہترین موقع ہے، ایونٹ میں نوجوان کھلاڑیوں کو سینئر کھلاڑیوں سے تجربہ حاصل کرنا چاہیے۔