کابل ائیرپورٹ پرپھنس جانے والے پی آئی اے کے طیاروں سے متعلق اہم خبر

اسلام آباد (قدرت روزنامہ)کابل ائیرپورٹ پرپھنس جانے والے پی آئی اے کے طیاروں سے متعلق اہم خبر،2طیاروں میں سے 1طیارہ 329 پاکستانیوں کو لیکر اسلام آباد پہنچ گیا۔ تفصیلات کے مطابق افغانستان سے 329 پاکستانیوں کو لے کر پی آئی اے کی پہلی پرواز پی کے 6250 اسلام آباد پہنچ گئی۔ذرائع کے مطابق بوئنگ777 کے ذرایعے 329 افرادکوکابل سے اسلام آباد لایا گیا ۔
سی ای او پی آئی اے ایئرمارشل ارشد ملک نے کہاکہ دوسری پرواز پی کے 6252 کابل سے روانہ ہو گئی،پرواز میں 170 مسافر سوار ہیں ،پرواز کچھ دیر بعد اسلام آباد لینڈ کرے گی۔واضح رہے کہ افغانستان کے دارالحکومت کابل میں طالبان کے داخلے کے بعد امریکا کے 4 سی ون تھرٹی طیاروں کی لینڈنگ کے لیے کابل ایئرپورٹ بند کردیا گیا اس دوران وہاں پھنسے پی آئی اے کے 2 طیاروں کو اڑان بھرنے کی اجازت دے دی گئی۔

اس موقع پر 2 امریکی ہیلی کاپٹرز نے کابل ایئرپورٹ کا محاصرہ کیا ہوا تھا ، کابل ایئرپورٹ بند ہونے کے بعد پی آئی اے کے دونوں طیاروں ایئر بس 320 اور 777 کو اڑان کی اجازت نہیں دی گئی ، بعد ازاں کابل ایئرپورٹ اتھارٹی نے پی آئی اے کے طیاروں کو اڑان بھرنے کی اجازت دے دی۔ترجمان پی آئی اے نے بتایا کہ کچھ پاکستانی کابل ایئرپورٹ پہنچے اور انہوں نے کہا کہ ہمیں پاکستان جانا ہے ، ان کے پاس ٹکٹس موجود نہیں تھے تاہم 8 مسافروں کو ایڈجسٹ کیا گیا ، بوئنگ 777 طیارہ اڑان بھرنے کے لیے تیار ہے جب کہ دوسرا طیارہ کچھ دیر بعد اسلام آباد کے لیے پرواز کرے گا۔
اُدھر افغانستان کے دارالحکومت کابل میں افغان طالبان کے داخلے کی اطلاعات کے بعد ترجمان دفتر خارجہ پاکستان نے کہا ہے کہ ابھی کابل میں سفارتخانہ بند کرنے کا کوئی فیصلہ نہیں کیا گیا ، پاکستان کا ہمیشہ مؤقف رہا ہے کہ افغانستان میں امن قائم ہو ، اپنے ایک بیان میں ترجمان دفتر خارجہ زاہد حفیظ چوہدری نے کہا کہ افغانستان کی صورتحال کو مسلسل مانیٹر کر رہے ہیں ، کابل میں پاکستان کا سفارتخانہ فعال ہے ، کابل میں سفارتی عملے کی سیکیورٹی کے لیے تمام اقدامات کیے ہیں، ابھی کابل میں سفارتخانہ بند کرنے کا کوئی فیصلہ نہیں کیا گیا۔
انہوں نے کہا کہ پاکستان کی کوشش ہے کہ سفارتخانہ بند نہ کرے ، افغانستان میں تمام پاکستانیوں کو ممکنہ مدد فراہم کی جارہی ہے، افغانستان میں صورتحال تیزی سے تبدیل ہورہی ہے ، پاکستان کا ہمیشہ مؤقف رہا ہے کہ افغانستان میں امن قائم ہو ، پاکستان ہمیشہ سے چاہتا ہے کہ سیکیورٹی صورتحال خراب نہ ہو۔ دوسری طرف افغانستان کی سورتحال سے متعلق افغان صدارتی محل میں ہوئے مذاکرات میں معاہدہ طے پا گیا ، افغان میڈیا کے مطابق افغان صدارتی محل میں طالبان اور حکومت کے درمیان مذاکرات جاری ہیں جہاں کابل پر حملہ نہ کرنے کا معاہدہ طے پا گیا ہے ، جس کے تحت طالبان عبوری حکومت کو اقتدار کی پرامن منتقلی کا فیصلہ کیا گیا ہے ، علی احمد جلالی نئی حکومت کے سرا راہ مقرر کئے جائیں گے جب کہ اس سارے معاملے میں عبداللہ عبداللہ ثالث کا کردار ادا کر رہے ہیں ، افغانستان کے قائم مقام وزیرداخلہ عبدالستار مرزا کوال نے اپنے ایک بیان میں کہا ہے کہ کابل پر حملہ نہیں کیا جائے گا اور حکومت کی منتقلی پرامن طریقے سے ہوگی ، کابل کے شہری یقین رکھیں کہ سکیورٹی فورسز شہر کی حفاظت یقینی بنائیں گے۔