پاکستانی انجینئر نے اسکریپ سے وینٹیلیٹر تیار کرلیا

(قدرت روزنامہ)استعمال شدہ اور بے کار اشیاء کو دوبارہ کارآمد بناکر پاکستانی انجینئر ڈاکٹر ریاض نے وینٹیلیٹر تیار کرلیا۔

تفصیلات کے مطابق شہر قائد میں واقع جامعہ این ای ڈی میں کئی ایجادات ایسی دیکھنے میں آئی ہیں جو غیرملکیوں کے لئے حیرت کا باعث ہیں، اس کی تازہ ترین مثال ڈاکٹر ریاض کی ہے جنہوں نے بے کار اشیاء سے ضرورت کے ان وقتوں میں وینٹیلیٹر تیار کرلیا ہے۔

ڈاکٹر ریاض کے 180 راتیں جامعہ کی لیب میں گزاریں اور پھر اس وینٹیلیٹر کو تخلیق کیا جو یقیناً ایک بڑا کارنامہ ہے، ڈاکٹر ریاض کے اس اقدام پر انہیں خوب پذیرائی مل رہی ہے۔

ڈاکٹر ریاض نے نجی ٹی وی چینل کے ایک پروگرام میں شرکت کی اور میزبان سے گفتگو کرتے ہوئے بتایا کہ وہ اپنی اس ایجاد کو بڑے اسکیل پر پہنچانے کے خواہش مند ہیں جو عالمی معیار کے عین مطابق ہے۔

ڈاکٹڑ ریاض کا کہنا تھا کہ ہم نے دیکھا کہ پاکستان میں چالیس ہزار وینٹیلیٹرز کی ضرورت ہے اور اس وقت پاکستان میں صرف 1600 وینٹیلیٹر موجود ہیں، جس کے باعث ہم نے مقامی سطح پر وینٹیلیٹر بنانے پر کام شروع کردیا۔

انہوں نے بتایا کہ میرے دوستوں نے اوریجینل وینٹیلیٹر کا اچھا اسکریپ دیا جس کی مدد سے ہم نے نیا وینٹیلیٹر تیار کیا۔

ڈاکٹر ریاض کا کہنا تھا کہ ہم نے اپنے ایجاد کردہ وینٹیلیٹر کے مختلف ورژن بنائے ہیں، سب سے پہلے ہم نے دو موڈ والا وینٹیلیٹر تیار کیا تھا۔

ڈاکٹر ریاض نے بتایا کہ وینٹیلیٹر بنانے والی بڑی کمپنیوں کے وینٹیلیٹر 65 سے 80 لاکھ مالیت کے ہوتے ہیں لیکن ہم نے جو وینٹیلیٹر بنایا ہے وہ 15 سے 20 لاکھ روپے مالیت کا ہے۔