سعودی ایئرلائن کا ’یوم وطنی‘ پر رعایتی ٹکٹوں کا اعلان

ریاض(قدرت روزنامہ) سعودی عرب کی سرکاری ایئرلائن ’السعودیہ‘ نے مملکت کے یوم وطنی پر خصوصی رعایت کا اعلان کردیا . مقامی میڈیا کے مطابق سعودی عرب کے یوم وطنی کے موقع پر اندرون مملکت پروازوں کے حوالے سے السعودیہ نے خصوصی پیشکش کا اعلان کیا ہے، جو کہ سعودی عرب کے تمام ایئرپورٹس کے لیے اور یکطرفہ ٹکٹ پر ہے .

ایئرلائن کی جانب سے ایک ٹویٹ میں بتایا گیا ہے کہ اس آفر سے فائدہ اٹھانے کے لیے ٹکٹوں کی بکنگ 23 ستمبر 2022 تک کرنا ہوگی اور اس ٹکٹ پر یکم جنوری سے 31 مارچ 2023ء کے دوران سفر کیا جاسکے گا، یہ خصوصی پیشکش اکانومی اور گیسٹ کلاس کی براہ راست پروازوں کے لیے ہے، جس کے تحت اکانومی کلاس کا ٹکٹ 92 اور گیسٹ کلاس کا ٹکٹ 192 ریال میں دستیاب ہے .

اسی طرح سعودی عرب کے قومی دن پر ریلوے کرایوں میں بھی کمی کا اعلان کیا گیا ہے، جس کے تحت 23 ستمبر کے روز جدہ سے مکہ مکرمہ کے لیے ریل کا کرایہ 9.2 سعودی ریال مقرر کیا گیا ہے، جدہ کے السلیمانیہ سٹیشن سے مکہ مکرمہ جانے والوں کے لیے ریل کا کرایہ 9.2 ریال ہوگا اور یہ خصوصی کرایہ سکیم صرف یوم الوطنی یعنی 23 ستمبرکے لیے ہی مخصوص کی گئی ہے .
یاد رہے کہ سعودی عرب میں ہر سال 23 ستمبر کو قومی دن منایا جاتا ہے، یہ دن 1932 میں عبد العزیز بن عبد الرحمن آل سعود کے ذریعے سعودی عرب کے یوم تاسیس کے طور پر منایا جاتا ہے، 23 ستمبر 1932ء کو سعودی عرب کی حکومت کا قیام عمل میں آیا، جب سلطان عبدالعزیز ابن سعود نے نجدو حجاز کے تمام علاقوں پر فتح و نصرت کا پرچم لہرایا اور عرب کے اس خطے کا نام المملک العربی السعودیہ رکھا گیا اور رواں برس سعودی عرب کا 92 واں قومی دن منایا جارہا ہے جس کی مناسبت سے تجارتی اداروں نے اپنی چند مصنوعات کے لیے 92 ریال کا نرخ مقرر کیا .
سعودی عرب میں قومی دن کی مناسبت سے تمام سرکاری ادارے بند رہتے ہیں جب کہ سعودی قومی دن لوک گیتوں کے رقص، گانوں اور روایتی تہواروں کے ساتھ منایا جاتا ہے، سڑکوں اور عمارتوں کو سعودی پرچموں سے سجایا جاتا ہے اور لوگ سبز اور سفید لباس زیب تن کرتے ہیں، مملکت میں چاروں طرف سبز اور سفید سعودی غبارے بھی لگائے جاتے ہیں .

. .
Ad
متعلقہ خبریں