متحدہ عرب امارات نے کورونا پابندیوں میں نرمی کردی

ابوظہبی(قدرت روزنامہ)متحدہ عرب امارات نے کورونا پابندیوں میں نرمی کردی، جس کے تحت پبلک مقامات پر ماسک پہننا لازمی نہیں ہے، صرف عبادت گاہوں، ہسپتالوں اور پبلک ٹرانسپورٹ پر ماسک پہننا ہوگا . اماراتی میڈیا کے مطابق متحدہ عرب امارات کی کرائسس اتھارٹی نے کہا ہے کہ تمام اندرونی عوامی مقامات پر چہرے کے ماسک اب لازمی نہیں ہیں، بدھ 28 ستمبر سے لوگوں کو صرف عبادت گاہوں، ہسپتالوں اور پبلک ٹرانسپورٹ پر ماسک پہننے کی ضرورت ہوگی .

اس حوالے سے دیگر اہم فیصلوں میں حکام نے بتایا کہ اسکولوں میں اساتذہ یا شاگردوں کو ماسک پہننے کی ضرورت نہیں ہوگی، لوگ ماسک پہننے کی ضرورت کے بغیر مالز، سپر مارکیٹوں، ہوٹلوں، بارز اور ریستورانوں میں جا سکیں گے، ہوم آئسولیشن کی مدت 10 دن سے کم کر کے 5 روز کردی گئی، ایئر لائنز کو ماسک کے حوالے سے فیصلہ کرنے کا اختیار ہوگا جب کہ ابوظہبی کے رہائشیوں کو الحوسن ایپ کو سبز رکھنے کے لیے ہر 30 دن میں ایک بار ٹیسٹ کروانے کی ضرورت ہوگی جس کا دورانیہ پہلے 14 دن تھا .
بتایا گیا ہے کہ صرف وہ شخص جس کا کوویڈ 19 کا ٹیسٹ مثبت آئے گا اسے قرنطینہ کرنے کی ضرورت ہوگی، نہ کہ کسی ایسے شخص کو جو ان کے ساتھ قریبی رابطے میں رہا ہو، روزانہ کوویڈ کیسز کی تعداد اب حکومت شائع نہیں کرے گی . بتاتے چلیں کہ اب تک لوگوں کو اس وقت تک ماسک پہننا پڑتا تھا جب تک کہ وہ کسی کیفے یا ریستوراں میں بیٹھتے یا کھانا کھاتے تھے کیوں کہ جان بچانے اور انفیکشن کو کم کرنے کی مقامی اور بین الاقوامی کوششوں میں ماسک مرکزی حیثیت رکھتے ہیں، یہی وجہ ہے کہ زیادہ تر وبائی امراض کے لئے متحدہ عرب امارات میں لوگوں کو انڈور اور آؤٹ ڈور دونوں ترتیبات میں چہرے کو ڈھانپنے کا پابند کیا گیا تھا تاہم فروری میں حکام نے باہر سے چہرے کو ڈھانپنے کی شرط کو ختم کر دیا تھا .
اس کے علاوہ ابوظہبی میں فروری سے مثبت کیسز کے قریبی رابطوں کے لیے قرنطینہ کی ضرورت نہیں تھی لیکن پھر بھی لوگوں کو مسلسل پانچ دن روزانہ پی سی آر ٹیسٹ لینے کا مشورہ دیا گیا، دبئی میں مثبت کیسز کے قریبی رابطوں کو جو کسی بھی علامات کا سامنا نہیں کر رہے ہیں انہیں قرنطینہ کرنے کی ضرورت نہیں ہے اور پی سی آر ٹیسٹنگ کی ضرورت نہیں ہے . کہا گیا ہے کہ فیس ماسک کے قوانین کو یکسر ختم کرنے کا فیصلہ اپریل 2020 کے بعد سے پابندیوں کی سب سے اہم نرمیوں میں سے ایک ہے کیوں کہ متحدہ عرب امارات میں کیسز میں مسلسل کمی آرہی ہے اور روزانہ کی سطح 300 سے 400 کے درمیان مثبت ٹیسٹ کے نتائج تک پہنچ چکے ہیں، جس کی بڑی وجہ یہ ہے کہ جون میں متحدہ عرب امارات نے اپنی کورونا ویکسی نیشن مہم میں ایک اہم سنگ میل عبور کیا جس میں ملک میں 100 فیصد ہدف گروپوں کو ویکسین لگائی گئی اور آج تک تقریباً 25 ملین کورونا ویکسین کی خوراکیں دی جا چکی ہیں .