سعودی عرب نے نئے ویزے متعارف کرادیے

ریاض (قدرت روزنامہ) سعودی عرب نے نئے تعلیمی ویزے متعارف کرائے ہیں، وزرا کی کونسل نے طویل اور مختصر مدت کے تعلیمی ویزے بنانے کا اعلان کیا . سعودی عرب کی سرکاری نیوز ایجنسی ایس پی اے نے رپورٹ کیا کہ یہ فیصلہ خادم حرمین شریفین شاہ سلمان کی زیر صدارت وزراء کونسل کے ہفتہ وار اجلاس میں کیا گیا، نیا طویل مدتی ویزا طلباء، محققین اور ماہرین کو تعلیمی مطالعے اور تحقیقی دورے کے مقاصد کے لیے دیا جائے گا جب کہ قلیل مدتی ویزا طلباء، محققین اور آنے والے ٹرینیز کو زبان کے مطالعے، تربیت، مختصر پروگراموں میں شرکت اور طلباء کے تبادلے کے پروگراموں کے مقاصد کے لیے دیا جائے گا، تعلیمی ویزا ہولڈرز کے لیے اسپانسر فراہم کرنے کی شرط نہیں ہوگی .

بتایا گیا ہے کہ اجلاس کے آغاز میں کابینہ کو حالیہ مذاکرات اور مشاورت کے مندرجات سے آگاہ کیا گیا جس میں سعودی عرب اور متعدد برادر اور دوست ممالک کے رہنماؤں اور ان کے نمائندوں کے درمیان بین الاقوامی سطح پر حالیہ پیش رفت کا احاطہ کیا گیا، اس تناظر میں کابینہ نے اچھے دفاتر کے لیے مملکت کی حمایت کا اعادہ کیا جس کا مقصد ایک ایسا سیاسی حل تلاش کرنا ہے جو روسی یوکرائنی بحران کے خاتمے کا باعث بنے اور اس کے اثرات کو کم کرنے کے لیے انسانی سطح پر اپنا تعاون جاری رکھے .
معلوم ہوا ہے کہ کابینہ نے انسانی ہمدردی کے اقدامات کو اپنانے کی کوششوں کے حصے کے طور پر روس اور یوکرین کی حکومتوں کے تعاون اور مختلف قومیتوں کے قیدیوں کو رہا کرنے میں ولی عہد شہزادہ محمد بن سلمان کی ثالثی پر اظہار تشکر کیا جب کہ مملکت نے دنیا کو درپیش چیلنجوں کا مقابلہ کرنے کے لیے مشترکہ کارروائی کی حمایت جاری رکھنے اور بین الاقوامی تعاون کو مضبوط بنانے اور ہر وہ چیز شروع کرنے پر زور دیا جو زیادہ پرامن اور منصفانہ دنیا کے حصول اور لوگوں اور آنے والی نسلوں کے لیے ایک امید افزا مستقبل کے حصول میں معاون ہو .