کراچی (قدرت روزنامہ) چیئرمین تحریک انصاف عمران خان کی ایک اور آڈیو لیک پر وزیر اطلاعات سندھ شرجیل میمن نے ردِعمل دیتے ہوئے کہا کہ آڈیو سے ثابت ہوا عمران خان خرید و فروخت کرتے رہے . شرجیل میمن نے اے آر وائے نیوز سے گفتگو میں کہا کہ عمران خان عوام کے سامنے بے نقاب ہو چکے ہیں .
سندھ ہاؤس میں کسی ممبر کی خرید و فروخت نہیں ہوئی .
جو ہم پر ووٹ خریدنے کی الزام تراشی کرتا تھا وہ خود اس میں ملوث نکلا . وزیر اطلاعات سندھ کا کہنا تھا کہ اب عمران خان کا نام ہارس ٹریڈنگ میں بھی صف اول پر آ رہا ہے . یاد رہے کہ چئیرمین پی ٹی آئی عمران خان کی مبینہ گفتگو کی ایک اور آڈیو لیک ہو گئی . عمران خان کو آڈیو لیکس میں کہتے سنا جا سکتا ہے کہ آپ کو یہ بڑی غلط فہمی ہو گئی ہے کہ اب نمبر گیم پوری ہو گئی ہے .
یہ نمبر گیم ایسا ہے نہیں،ایسا مت سمجھیں کہ سب ختم ہو گیا . اب سے لے کر 48 گھنٹے کافی وقت ہے،اس میں بڑی چیزیں ہو رہی ہیں . میں اپنی طرف سے کئی چالیں چل رہا ہوں جو ہم پبلک نہیں کر سکتے . پانچ تو میں خرید رہا ہوں، میں نے میسج دینا ہے ، وہ پانچ بڑے اہم ہیں . اس کو کہیں 5 اور سیکیور کر دے تو 10 ہو جائیں گے، گیم ہمارے ہاتھ میں ہے . اس وقت قوم الارم ہوئی ہے،لوگ چاہ رہے ہیں کسی طرح ہم جیت جائیں .
اس لیے کوئی فکر نہ کریں یہ غلط ہے یا صحیح . کوئی بھی حربہ ہو . ایک ایک بھی کوئی توڑ دیتا ہے تو اس سے بھی بہت فرق پڑے گا . اس سے قبل بھی عمران خان کی آڈیو لیک ہوئی تھی . مبینہ آڈیو میں عمران خان کو یہ کہتے ہوئے سنا جا سکتا ہے کہ امریکا کا نام نہیں لینا،بس صرف یہ کھیلنا ہے کہ اوپر کہ یہ ڈیٹ پہلے سے تھی . اعظم خان کہتے ہیں کہ میں سوچ رہا اس سائفر کے اوپر ایک میٹنگ کر لیتے ہیں . آپ کو یاد تو ہے آخر میں ایمبیسڈر نے لکھا تھا ڈیمارچ کر لیں . وہ میں منٹس بنا لوں گا کہ فارن سیکرٹری نے یہ چیز بنا دی ہے .