تمام گاڑیوں سے CNG سیلینڈرز ہٹائیں، آگ بجھانے کے آلات نصب کریں، شرجیل انعام میمن

کراچی (قدرت روزنامہ)پبلک ٹرانسپورٹ میں حفاظتی انتظامات کی چیکنگ مہم کا آغاز کیا جائے اور بسوں، کوسٹرز اور اسکول وین میں آگ بجھانے کے آلات ایک ماہ میں نصب کئے جائیں۔یہ ہدایات صوبائی وزیر ٹرانسپورٹ شرجیل انعام میمن نے اجلاس کی قیادت کرتے ہوئے جاری کیں۔صوبائی وزیر ٹرانسپورٹ کی زیر صدارت ہونے والے اجلاس میں کہا گیا کہ مسافروں کی حفاظت ٹرانسپورٹرز کی ترجیح ہونی چاہیے۔

مسافروں کی حفاظت کے لیے پبلک ٹرانسپورٹ میں حفاظتی انتظامات کی چیکنگ مہم کا آغاز فوری کیا جائے۔اس کے ساتھ ہی ٹرانسپورٹرز کو بسوں، کوسٹرز اور اسکول وین میں آگ بجھانے کے آلات نصب کرنے کے لئے ایک مہینے کی ڈیڈ لائن دی جائے۔صوبائی وزیر نے اجلاس سے خطاب کرتے ہوئے کہا ہے کہ ٹرانسپورٹرز کی غیر ذمہ داری اور ڈرائیورز میں ایمرجنسی صورتحال سے نمٹنے کے لیے آگاہی نہ ہونے کی وجہ سے افسوسناک حادثات میں سینکڑوں قیمتی جانیں ضائع ہوتی ہیں۔
ان کا کہنا ہے کہ موٹر وہیکل رجسٹریشن قوانین کی خلاف ورزی کرنے والے ٹرانسپورٹرز کے اجازت نامے منسوخ کئے جائیں۔انہں نے اجلاس میں تمام گاڑیوں سے CNG سیلینڈرز ہٹائے کا حکم دیتے ہوئے کہا کہ محکمہ ٹرانسپورٹ اس معاملے کو سنجیدگی سے انجام دے، غفلت برتنے والوں کے خلاف سخت کارروائی کی جائے گی۔
اجلاس میں پیپلز بس سروس کے مسائل پر بھی غور و خوض کیا گیا۔شرجیل میمن نے کہا کہ پیپلز بس سروس سندھ حکومت کا میگا پائلٹ پروجیکٹ ہے۔ ایم ڈی سندھ ماس ٹرانزٹ اتھارٹی کو بس سروس کے مانیٹرنگ سسٹم کو بہتر کرنے کی ضرورت ہے۔
اجلاس میں سیکریٹری ٹرانسپورٹ عبدالحلیم شیخ ، ایم ڈی سندھ ماس ٹرانزٹ اتھارٹی کیپٹن ر الطاف حسین ساریو ، ایڈیشنل سیکرٹری ٹرانسپورٹ مشتاق شیخ، بشیر حسین اسسٹنٹ ڈائریکٹر لیگل سندھ ماس ٹرانزٹ اتھارٹی ، آپریشن منیجر آپریشنز این آر ٹی سی عبدالشکور و دیگر نے شرکت کی۔