بارشوں برسانے والا ایک اور سسٹم ملک میں داخل ہونے کو تیار

اسلام آباد (قدرت روزنامہ)بارشوں برسانے والا ایک اور سسٹم کل 10 نومبر سے ملک کا رخ کرے گا۔محکمہ موسمیات کے مطابق 10 نومبر سے ملک میں ایک اور مغربی ہواؤں کا سلسلہ داخل ہوگا جس کے اثرات بلوچستان اور بالائی علاقوں تک ہی محدود رہنے کا امکان ہے۔
محکمہ موسمیات نے بتایا کہ بارش برسانے والا سسٹم بالائی علاقوں میں منتقل ہوگیا ہے جس کے باعث کراچی میں بارش کا امکان ختم ہوگیا ہے۔کراچی میں چند روز تک صبح کے وقت ہلکی دھند رہنے کا امکان ہے جبکہ ملک کے مختلف شہروں میں بارش کے بعد موسم مزید سرد ہوگیا ہے۔
محکمہ موسمیات کا کہنا ہے کہ کراچی میں آج مطلع جزوی ابرآلود رہے گا جبکہ آج کم سے کم درجہ حرارت 19.5 ڈگری سینٹی گریڈ ریکارڈ کیا گیا۔علاوہ ازیں آج زیادہ سے زیادہ درجہ حرارت 32 تا 34 ڈگری سینٹی گریڈ رہنے کا امکان ہے جبکہ اس وقت شہر میں 12 کلو میٹر فی گھنٹہ کی رفتار سے شمال مغربی ہوا چل رہی ہے۔
خیال رہے کہ محکمہ پی ڈی ایم اے بلوچستان نے ان ممکنہ بارشوں کے حوالے سے متعلقہ اداروں کو پیشگی انتظامات کرنے اور موسم کے حوالے سے آگاہ کرنے کے لئے مراسلہ لکھ دیا۔ تاکہ کسی بھی صورتحال سے بروقت نمٹا جاسکے۔
رواں سال معمول سے زیادہ سردی پڑنے کا امکان
پاکستان بھر میں رواں سال معمول سے زیادہ سردی پڑنے کا امکان ہے۔اس حوالے سے سردار سرفراز چیف میٹرولوجسٹ کا کہنا تھا کہ پاکستان میں رواں سال موسم سرما معمول سے زائد سرد ہوگا ۔
انہوں نے بتایا کہ کراچی میں سرد موسم کا آغاز نومبر کے وسط سے ہوگا جس دوران راتیں سرد ہونا شروع ہوجائینگی جبکہ نومبر کے آخر تک دن کے درجہ حرارت میں بھی خاطر خواہ کمی ہونا شروع ہوگی۔
ان کا کہنا تھا کہ کراچی میں بھی رواں سال سردی زیادہ پڑ سکتی ہے لیکن اس حوالے سے کچھ بھی کہنا قبل از وقت ہے۔انہوں نے بتایا کہ اکتوبر کا مہینہ ہمیشہ گرم ہوتا ہے تاہم گرمی کی شدت میں کمی نومبر کے پہلے ہفتے سے آنا شروع ہو جائے گی۔