امریکی صدر کو افغانستان میں اپنے شہریوں پر حملوں کا ڈر ، انخلا آپریشن جلد مکمل کرنے پر زور

واشنگٹن (قدرت روزنامہ)امریکی صدر جو بائیڈن نے افغانستان کی صورتحال پر خطاب میں کہا کہ داعش کے حملے بڑھنے کا امکان ہے ، انخلا کا عمل جلد مکمل کرنا ہوگا۔نجی ٹی وی جیو نیوز کے مطابق امریکی صدر جوبائیڈن نے کہا کہ افغانستان سے انخلاء کا عمل جتنی جلد مکمل ہو سکے اتنا بہتر ہے ، ہمیں معلوم ہے کہ داعش کابل ائیرپورٹ ، امریکی اور اتحادی افواج پر حملے کرنے کی تاک میں ہے ، ہم 10 روز میں 70 ہزار 700 افراد کو افغانستان سے نکالنے میں کامیاب ہوئے ، اسی رفتار سے مکمل انخلاء 31 اگست تک ہو جائے گا۔جوبائیڈن نے مزید کہا کہ جی 7 ممالک اور دیگر اتحادی طالبان کے بارے میں ایک ہی رائے رکھتی ہیں افغانستان کے چیلنجز کا مل کر مقابلہ کرنے پر متفق ہیں۔ ہم میں سے کسی کو بھی طالبان کی باتوں پر یقین نہیں، اپنے اداروں سے کہا کہ ہے کہ ہنگامی صورتحال سے نمٹنے کا پلان بنا کر رکھیں ، ہم سب مل کر طالبان کے طرز عمل کو دیکھیں گے۔افغان پناہ گزینوں کے بارے میں امریکی صدر کا کہنا تھا کہ تمام اتحادی ممالک مل کر افغان پناہ گزین کی امداد جاری رکھیں گے ۔