طلاق کے2 برسوں بعد سائرہ یوسف اور شہروز سبزواری ایک ساتھ نظر آئیں گے

اسلام آباد (قدرت روزنامہ)2020 میں راہیں جدا کرنے والی پاکستانی شوبز انڈسٹری کی معروف فنکار جوڑی شہروز سبزواری اور سائرہ یوسف ایک بار پھر ایک ساتھ نظر آئیں گے۔گزشتہ روز اداکار شہروز اور اداکارہ سائرہ نے اپنے سوشل میڈیا اکاؤنٹس، انسٹاگرام پر آنے والی نئی فلم ’بے بی لیشیئس‘ کا پوسٹر شیئر کرتے ہوئے یہ خوشخبری اپنے مداحوں کو سنائی۔

فلم کا پوسٹر شیئر کرتے ہوئے ادکارہ کا کہنا تھا کہ وہ اپنی فلم کی خبر شیئر کرتے ہوئے بہت پُرجوش ہیں، آئندہ فروری 2023 میں ہمیں اس فلم ’بے بی لیشیئس‘ سے منسلک ہوئے 12 سال ہو جائیں گے، آپ سب کے ساتھ اپنی فلم کی پہلی جھلک شیئر کر رہی ہوں۔

دوسری جانب اداکار شہروز نے سائرہ کو ٹیگ کرتے ہوئے پوسٹر شیئر کیا، پوسٹ کے کیپشن میں اداکار کا کہنا تھا کہ جی ہاں، ہماری فلم ریلیز ہونے والی ہے، ہم صرف ویلینٹائن کے آنے کا انتظار کر رہے تھے، ہماری نئی فلم ’بے بی لیشیئس‘ کی پہلی جھلک ملاحظہ کریں۔
واضح رہے کہ سائرہ یوسف اور شہروز سبزواری کی یہ فلم 2023 کے فروری میں ریلیز کی جا رہی ہے۔فلم ’بے بی لیشیئس‘ کا پوسٹر دیکھ کر جہاں اس جوڑی کے مداح بے حد خوش ہیں وہیں کچھ جوڑی کے ٹوٹ جانے پر غمگین بھی ہے۔
یاد رہے کہ سائرہ یوسف اور شہروز سبزواری کی 2012ء میں شادی ہوئی تھی جبکہ اس جوڑی کا 2020ء میں طلاق پر رشتہ ختم ہو گیا تھا۔اس جوڑی کی ایک بیٹی بھی ہے۔