صوبائی وزیر تعلیم پنجاب ڈاکٹر مراد راس نے یکساں نصاب تعلیم لانے کا اصل مقصد بتا دیا

لاہور(قدرت روزنامہ)صوبائی وزیر تعلیم ڈاکٹر مراد راس نے کہاہے کہ یکساں نصاب تعلیم اس لئے لائے تاکہ طبقاتی فرق ختم ہو، خاص مافیا یکساں نصاب تعلیم کے خلاف ہے۔

مقامی ہوٹل میں’سر سید تعلیم کانفرنس‘ سے خطاب کرتے ہوئے صوبائی وزیر تعلیم ڈاکٹر مراد راس نے کہا کہ یکساں نظام تعلیم پر پنجاب کے 70 فیصد پرائیویٹ سکول متفق ہیں،نجی اور سرکاری سکولوں کے اساتذہ کو تربیت دے رہے ہیں، چار لاکھ اساتذہ کو یکساں نصاب پر تربیت دی جارہی ہے، پچاس فیصد ٹرینر نجی سکولوں سے لائے ہیں، نجی سکولوں کے ٹرنیرز نے یکساں نصاب کو بہترین قرار دیا ہے۔

انہوں نے کہا کہ پچھلے دس سالوں میں نجی سیکٹر کو پروان چڑھایا گیا،سرکاری سکولوں کو دبایا گیا، مالی فوائد کی وجہ سے نجی سکولوں کو فائدہ دیا گیا،سابقہ حکومت نے ایجوکیشن میں بھی جدید ٹیکنالوجی استعمال نہیں کی، وزارت جوائن کرنے پر پتہ چلا کہ میں تو ٹرانسفر منسٹر ہوں، ہمارے اساتذہ کو ٹرانسفر پروموشن اور اے سی آر میں پھنسایا ہوا تھا۔

صوبائی وزیر تعلیم پنجاب نے کہاکہ ہم اساتذہ کو تمام چیزوں سے آزاد کرنے جا رہے ہیں، اساتذہ کا کام پڑھانا ہے اور وہ صرف پڑھائیں گے، جدید ٹیکنالوجی سے کرپشن ختم ہو گی، سابقہ ادوار میں حکومتوں میں آنے والوں نے صرف اپنے بارے میں سوچا کہ ہمارے پاس کیا آ رہا ہے۔

انہوں نے کہاکہ پرائیویٹ سکولز کے ٹرینرز نے بھی واحد تعلیمی نظام کے نصاب کی تعریف کی، ہم پبلک سیکٹر کو اس لئے پروموٹ کر رہے ہیں کیونکہ اس میں قوم کا فائدہ ہے، گزشتہ دس سالوں میں کسی کا فائدہ تو تھا جو پبلک سیکٹر کی بجائے پرائیویٹ تعلیم کو پروموٹ کیا گیا۔