امارات سے ترکیہ و شام کے زلزلہ متاثرین کو 27 طیاروں میں امداد روانہ

ابوظہبی(قدرت روزنامہ) متحدہ عرب امارات نے ترکیہ اور شام میں زلزلہ متاثرین کی امداد کے لیے 27 کارگو طیارے بھیج دیے۔ خلیجی میڈیا کے مطابق مزید 5 کارگو طیارے ترکیہ اور شام پہنچ گئے، جو دونوں ممالک کے زلزلہ زدگان کے لیے امدادی سامان لے کر پہنچے ہیں، جس کے ساتھ ہی متحدہ عرب امارات سے ان ممالک کے لیے 27 کارگو طیاروں میں امدادی سامان متاثرہ ممالک میں پہنچ چکا ہے، کیوں کہ ملکی قیادت کی ہدایت کے تحت مشترکہ آپریشنز کمانڈ کے ذریعے اور شراکت داروں کے تعاون سے دونوں ممالک میں اس کی امدادی سرگرمیاں جاری ہیں، جس کے تحت اب تک امارات کی جانب سے ترکی کے لیے اڑان بھرنے والے 17 کارگو طیاروں کی مجموعی تعداد اور شام کے لیے 10 کارگو طیاروں کی کل تعداد 107 ٹن امدادی سامان لے کر ان ممالک میں پہنچ چکی ہے، معلوم ہوا ہے کہ امدادی سامان میں 87 ٹن کھانے پینے کی اشیاء اور 20 ٹن دیگر ضروریات کا سامان ہے جن میں میڈیکل اور زلزلے سے متاثرہ افراد کو پناہ دینے کے لیے 432 خیمے بھی شامل ہیں جب کہ ترکی کے ضلع اصلاحیہ میں موبائل فیلڈ ہسپتال کی تیاری کے لیے کام جاری ہے، زخمیوں کو وصول کرنے اور انہیں طبی امداد فراہم کرنے کے لیے اس ہسپتال کو کھولاجارہا ہے، اس کے علاوہ اماراتی ریسکیو ٹیمیں مشکل موسمی حالات کے درمیان اپنی کوششیں جاری رکھے ہوئے ہیں،ٹیم کرمانماراس کے علاقے میں 4 لوگوں کو زندہ بچانے میں کامیاب ہوئی، 9 متاثرین کو ملبے کے نیچے سے نکالا اور ٹیمیں ابھی تک اپنی کوششیں مکمل کر رہی ہیں۔
بتایا گیا ہے کہ ترکیہ اور شام میں تلاش اور امدادی ٹیموں کی تعداد 134 اماراتی ریسکیو اہلکاروں تک پہنچ گئی ہے، جو خراب موسم کے باوجود اپنی انسانی ڈیوٹی سرانجام دے رہے ہیں، اسی طرح ایمریٹس ایئرلائنز بین الاقوامی انسانی ہمدردی کے اداروں کے ساتھ مل کر ایک ہوائی پل کا آغاز کر رہی ہے تاکہ زمین پر امدادی سرگرمیوں اور تباہ کن زلزلوں کے تناظر میں تلاش اور بچاؤ کی سرگرمیوں میں مدد کے لیے فوری سامان، طبی سامان اور آلات کی منتقلی کی جا سکے۔
اس سلسلے میں ایمریٹس ایئرلائنز کی پروازوں EK121 اور EK117 نے کل اڑان بھری، جس میں اقوام متحدہ کے ہائی کمشنر برائے مہاجرین کی جانب سے تھرمل کمبل اور فیملی ٹینٹ پر مشتمل سامان کی پہلی کھیپ روانہ کی گئی، اس کے بعد عالمی ادارہ صحت کی جانب سے اور عالمی فوڈ پروگرام انٹرنیشنل سٹی فار ہیومینٹیرین سروسز کے ساتھ مل کر طبی کٹس اور پناہ گاہوں کا امدادی سامان فراہم کیا گیا، ایمریٹس اسکائی کارگو استنبول میں اپنے روزانہ آپریشنز کے ذریعے اگلے دو ہفتوں کے دوران 100 ٹن انسانی امدادی اشیاء کی ترسیل کی گنجائش مختص کرنے کا ارادہ رکھتا ہے، مقامی تنظیمیں ایمریٹس ایئرلائنز سے ہنگامی سامان وصول کریں گی تاکہ انہیں جنوبی ترکیہ اور شمالی شام کے متاثرہ علاقوں تک پہنچایا جا سکے۔