خیبر پختو نخوا انتخابات،پشاور ہائیکورٹ نے گورنر کو جواب جمع کرانے کیلئے آخری مہلت دے دی

پشاور (قدرت روزنامہ) خیبر پختو نخوا الیکشن،پشاور ہائیکورٹ نے گورنر کو جواب جمع کرانے کیلئے آخری مہلت دے دی . تفصیلات کے مطابق پشاور ہائیکورٹ میں خیبر پختو نخوا اسمبلی کے انتخابات 90 روز میں کرانے کیلئے درخواستوں پر سماعت ہوئی،پی ٹی آئی رہنما شبلی فراز،شاہ فرمان اور شوکت یوسفزئی عدالت میں پیش ہوئے .

جسٹس اشتیاق ابراہیم نے ریمارکس دئیے کہ دو دن کا وقت دیتے ہیں جس نے جواب جمع کرانا ہے کرا دے .
پی ٹی آئی کے وکیل نے بتایا کہ عدالت نے گورنر اور الیکشن کمیشن سے جواب طلب کیا تھا،عدالت نے قرار دیا کہ ہمارے پاس الیکشن کمیشن اور صوبائی حکومت کا جواب آیا ہے . ایڈووکیٹ جنرل نے بتایا کہ گورنر سے رابطہ کیا تھا وہ مانسہرہ میں ہیں،گورنر گزشتہ رات پہچنے دو دن میں جواب جمع کرا دیں گے .
جسٹس اشتیاق ابراہیم نے ریمارکس دئیے کہ دو دن میں جواب جمع کرائیں،ہم جلد درخواستوں پر فیصلہ کرنا چاہتے ہیں .

پی ٹی آئی وکیل نے کہا کہ ایڈووکیٹ جنرل گورنر کی نمائندگی نہیں کر سکتے،عدالت نے ریمارکس دئیے کہ ایڈووکیٹ جنرل نے صرف جواب سے متعلق آگاہ کیا،ایڈووکیٹ جنرل گورنر کی نمائندگی کر سکتے ہیں یا نہیں اس کو دیکھ لیں گے . پشاور ہائیکورٹ نے گورنر کو جواب جمع کرانے کیلئے آخری مہلت دے دی،عدالت نے کیس کی سماعت 20 فروری تک ملتوی کر دی . یاد رہے کہ گزشتہ سماعت پر پشاور ہائیکورٹ نے خیبر پختو نخوا میں الیکشن سے متعلق درخواست پر صوبائی حکومت اور الیکشن کمیشن سے جواب طلب کیا .
پشاور ہائیکورٹ میں 90 روز میں خیبر پختو نخوا الیکشن سے متعلق پی ٹی آئی کی درخواست پر سماعت ہوئی،درخواست گزار کے وکیل نے بتایا کہ آئین کے مطابق انتخابات کیلئے تاریخ دینا گورنر کی ذمہ داری ہے اور اسمبلی تحلیل کے بعد 90 دن میں انتخابات کرانا لازمی ہے . جسٹس ایس ایم عتیق شاہ نے ریمارکس دئیے کہ قانون کے مطابق 90 روز میں الیکشن کرانا لازمی ہے،عدالت نے استفسار کیا کہ اگر گورنر اپنی آئینی ذمہ داری پوری کرنے میں ناکام ہو تو پھر کیا ہو گا؟