تاپسی پنوں نے ماڈلنگ نہ کرنے کا فیصلہ کیوں کیا؟ چونکا دینے والا انکشاف

ممبئی(قدرت روزنامہ)بالی ووڈ کی ورسٹائل اداکارہ تاپسی پنوں اداکارہ بننے سے قبل ماڈلنگ کی دنیا میں دلچسپی رکھتی تھی لیکن نا خوشگوار واقعے نے انہیں فیصلہ بدلنے پر مجبور کردیا۔
اداکارہ نے بتایاکہ اپنے زمانہ طالب علمی میں تو انہوں نے مس انڈیا مقابلہ 2008 میں بھی قسمت آزمائی کی اور وہاں ٹاپ 28 میں شامل رہیں لیکن یہ تجربہ تاپسی کے لیے کچھ زیادہ خوشگوار نہیں تھا، اس کی وجہ یہ تھی کہ وہاں پر ٹرائل کے دوران اقرباء پروری اور سفارش عروج پر تھی۔

تاپسی کے مطابق وہاں کے ایک ڈیزائنر نے تو ان کی توہین کرتے ہوئے کہا کہ آپ کو یہاں پر نہیں ہونا چاہیے، ماضی کو یاد کرتے ہوئے ان کا کہنا تھا کہ دہلی سے منتخب ہونے والی تین لڑکیوں میں سے وہ ایک تھیں اور اس کے بعد انہیں پروفیشنل ماڈلز کے خلاف مقابلے میں جانا تھا۔
پروفیشنلز سے تقابل کے دوران انہیں اندازہ ہوا کہ وہ تو ان کے مقابلے میں ناتجربہ کار اور شوقیہ اس فیلڈ میں آئی ہیں اور صرف فوٹو شوٹس کیے ہیں۔ جبکہ نہ تو انہوں نے ٹیلی ویژن ایڈ میں کام کیا اور نہ ہی ریمپ پر واک کیا ہے۔ایک انٹرویو کے دوران تاپسی کا مزید کہنا تھا کہ مقابلہ حسن کے گرومنگ پیریڈ کے دوران انہیں اندازہ ہوگیا تھا کہ اس شعبے میں وہ کام نہیں کرسکتیں۔
وہاں پر ہم سے واک کروایا جاتا اور یہ سکھایا جاتا تھا کہ کیسے مسکرایا جاتا ہے، اس زمانے میں ڈیزائنر ہیمنت ترویدی ماہر ٹیچر ہوا کرتے تھے اور انہوں نے ہی میری توہین کرتے ہوئے کہا کہ اگر میرے ہاتھ میں ہوتا تو میں تمہیں کبھی ٹاپ 28 میں نہ آنے دیتا۔