پٹرولیم مصنوعات کی قیمتوں میں کمی کا امکان، اوگرا نے حکومت کو سمری بھجوا دی

اسلام آباد(قدرت روزنامہ) اوگرا نے پٹرولیم مصنوعات کی قیمتوں سے متعلق حتمی سمری حکومت کو بھجوا دی ہے۔ذرائع کے مطابق اوگرا کا کہنا ہے کہ عالمی منڈیوں میں خام تیل کی قیمتوں میں مسلسل کمی کا رجحان ہے، پٹرولیم مصنوعات کی قیمتوں میں 10 سے 15 روپے فی لیٹر تک کمی کی جا سکتی ہے۔
اوگرا کی جانب سے پٹرول کی قیمت میں 10 سے 12 روپے فی لیٹر جبکہ ڈیزل کی قیمت میں 10 سے 15 روپے فی لیٹر تک کمی کی تجویز دی گئی ہے جبکہ لائٹ ڈیزل آئل کی قیمت میں 15 روپے فی لیٹر تک کمی کی سفارش کی گئی ہے۔ذرائع کا کہنا ہے کہ اوگرا نے دوسری تجویز دیتے ہوئے کہا کہ بجٹ خسارہ پورا کرنے کیلئے پٹرولیم مصنوعات کی قیمتیں برقرار بھی رکھی جا سکتی ہیں۔
اوگرا پٹرولیم مصنوعات کی قیمتوں سے متعلق حتمی سمری آج بھجوائے گا، پٹرول پر فی لٹر او سی اے مارجن بھی بڑھایا جا سکتا ہے، فریٹ مارجن کے متعلق او سی اے کی جانب سے خط بھی لکھا گیا ہے۔ذرائع کے مطابق پٹرولیم مصنوعات کی قیمتوں سے متعلق فیصلہ آج ہوگا، پٹرولیم مصنوعات کی نئی قیمتوں کا اطلاق یکم اپریل سے ہوگا۔یاد رہے کہ عالمی مارکیٹ میں گزشتہ 15 روز میں خام تیل کی قیمت 70 ڈالر فی بیرل تک رہی۔