شہبازشریف کا یوم دفاع پر شہداء، جنگ ستمبر کے ہیروز اور غازیوں کو سلام

اسلام آباد (قدرت روزنامہ) پاکستان مسلم لیگ (ن) کے صدر اور قائد حزب اختلاف شہبازشریف نے یوم دفاع پر شہداء، جنگ ستمبر کے ہیروز اور غازیوں کو سلام کرتے ہوئے کہا ہے کہ 1965 میں آج کے دن قوم نے بے مثال یک جہتی سے اپنے سے کئی گنا بڑے دشمن کو شکست فاش دی تھی ۔ انہوںنے کہاکہ آج کے دن ہمارے سر اللہ تعالی کے حضور سجدہ شکر بجالاتے ہیں کہ اس نے ہمیں کئی گنا بڑے دشمن پر فتح عطا فرمائی ،1965 میں آج کے دن قوم نے بے مثال یک جہتی سے اپنے سے کئی گنا بڑے دشمن کو شکست فاش دی تھی ،ہماری بہادر افواج نے زمین، فضاء اور سمندروں میں دشمن کو منہ توڑ جواب دے کر قوم کو فتح سے ہمکنار کیا ،آج کا دن پاکستانی قوم اور مسلح افواج کے اتحاد سے تاریخی فتح کا پرمسرت دن ہے ۔

انہوںنے کہاکہ ہم شہداء کی عظیم قربانیوں کو خراج عقیدت پیش کرتے ہیں اور غازیوں کی جرات کو سلام پیش کرتے ہیں ۔ انہوںنے کہاکہ یہ دن ہمارے لئے مثال ہے کہ اگر قوم یک جان اور متحد ہو تو ہر مشکل، ہر دشمن کو شکست دی جاسکتی ہے ،ہماری بری، بحری اور بحری افواج نے عزم وہمت ، پیشہ وارانہ قابلیت اور شجاعت کے روشن باب رقم کئے ۔ انہوںنے کہاکہ جنگ ستمبر ہماری تاریخ کا سنہری باب ہے جس میں پاکستان کے عوام نے اپنی افواج کے ساتھ بے مثال محبت کی تاریخ لکھی ۔
انہوںنے کہاکہ پاکستان کے شہریوں نے جس جذبے، جوش اور وطن کے لئے ایثارو عظیم محبت کا ثبوت دیا، وہ قابل فخر اور ناقابل فراموش ہے ۔ انہوںنے کہاکہ اللہ تعالی کے فضل وکرم سے نوازشریف کی قیادت میں مسلم لیگ (ن) نے دفاع وطن کو ناقابل تسخیر بنانے میں بڑا حصہ ڈالا ہے ،پاکستان کو دنیا کی ساتویں ایٹمی قوت بنا کر نوازشریف نے دفاع وطن کو ناقابل تسخیر بنایا، دنیا میں سربلند کیا ،الحمداللہ جے ایف 17 تھنڈر اور جدید ترین ہتھیار فراہم کرکے پاک فضائیہ کی قوت کو چار چاند لگائے۔
انہوںنے کہاکہ نوازشریف کی بنائی ہوئی موٹر وے آج دفاع وطن کے عظیم مقصدکے لئے بھی بروئے کار آرہی ہے،اللہ تعالی نے پھر موقع دیا تو ماضی سے بھی بڑھ کر اپنی مسلح افواج اور دفاع وطن کو مزید طاقتور اور توانا بنائیں گے ۔ انہوںنے کہاکہ آج کا دن ہمارے لئے سبق بھی ہے کہ ہم معاشی قوت بنیں اور اپنی خودمختاری اور ناقابل تسخیر دفاع کو یقینی بنائیں ،اللہ تعالی شہداء کے درجات کو بلند فرمائے، ان کے اہل خانہ کو صبر جمیل دے۔ آمین۔