وزیراعظم سمیت کسی کابینہ رکن نے میری خیریت دریافت نہیں کی، ڈاکٹر عبدالقدیر خان

اسلام آباد(قدرت روزنامہ)محسن پاکستان ڈاکٹر عبدالقدیر خان نے اپنے بیان میں کہا ہے کہ میں ہسپتال میں زیر علاج ہوں لیکن وزیراعظم عمران خان سمیت کسی کابینہ رکن نے میری خیریت دریافت نہیں کی، مجھے اس بات کا افسوس ہے۔

میڈیا رپورٹس کے مطابق ڈاکٹر عبدالقدیر نے کہا ہے کہ کسی ایک بھی سرکاری عہدیدار نے انھیں ٹیلی فون تک نہیں کیا۔

خیال رہے کہ ڈاکٹر عبدالقدیر خان ان دنوں خرابی صحت کے باعث راولپنڈی کے ملٹری ہسپتال میں زیر علاج ہیں۔ کہا جا رہا ہے کہ ان کی صحت بہتری کی جانب گامزن ہے، اس لئے ہو سکتا ہے کہ انہیں جلد ہی گھر منتقل کر دیا جائے۔

ڈاکٹر عبدالقدیر خان نے کہا ہے کہ ڈاکٹروں کی ٹیم مکمل چیک اپ کرکے مجھے ہسپتال میں رکھنے یا گھر بھیجنے کا فیصلہ کرے گی۔

خیال رہے کہ مسلم لیگ (ن) کے صدر میاں شہباز شریف نے محسن پاکستان ڈاکٹر عبدالقدیر خان کی صحت بارے اپنے خدشات کا اظہار کیا تھا۔

سماجی رابطوں کی ویب سائٹ ٹویٹر پر جاری پیغام میں انہوں نے کہا تھا کہ ڈاکٹر عبدالقدیر خان کو مصنوعی تنفس پر منتقل کرنے کی رپورٹس انتہائی پریشان کن ہے۔