ڈیجیٹل دنیا کے چیلنجوں سے نمٹنے کے لیے ابھی صحیح حکمت عملی تیار کرنا باقی ہے، جان اچکزئی

نگران صوبائی وزیر اطلاعات جان اچکزئی نے وائس آف بلوچستان کے زیر اہتمام انسداد دہشت گردی پر مختصر دورانیے کی دستاویزی فلمی مقابلے کی اختتامی تقریب سے خطاب
کوئٹہ (قدرت روزنامہ)نگران صوبائی وزیر اطلاعات جان اچکزئی نے وائس آف بلوچستان کے زیر اہتمام انسداد دہشت گردی پر مختصر دورانیے کی دستاویزی فلمی مقابلے کی اختتامی تقریب سے خطاب کرتے ہوئے کہا ہے کہ سوشل میڈیا ایک طاقتور ٹول ہے جس کے ذریعے نوجوانوں تک مثبت انداز سے رسائی اور انہیں تعمیری طریقوں سے منسلک کرنے کے لیے استعمال کیا جا سکتا ہے انہوں نے کہا کہ سوشل میڈیا پر بیانیہ کی تشکیل میں حکومت، سیکورٹی اداروں اور سول سوسائٹی سب کا کردار ہے، اور ڈیجیٹل دنیا کے چیلنجوں سے نمٹنے کے لیے ابھی صحیح حکمت عملی تیار کرنا باقی ہے۔

اچکزئی نے سوشل میڈیا پر انسداد دہشت گردی کے پیغامات کی اہمیت پر بھی بات کی۔ انہوں نے کہا کہ نوجوان خاص طور پر انتہا پسندی کا شکار ہیں، اور یہ کہ انہیں دہشت گردی کے خطرات کے بارے میں درست معلومات فراہم کرنا بہت ضروری ہے جان اچکزئی نے کہا کہ وائس آف بلوچستان صوبے کے حقیقی مسائل کو اجاگر کرنے اور نوجوانوں کو شامل کرنے میں بہت اچھا کام کر رہا ہے۔

انہوں نے نوجوانوں پر زور دیا کہ وہ امن اور رواداری کو فروغ دینے اور انتہا پسندی کے پیغام کو مسترد کرنے کے لیے سوشل میڈیا کا استعمال کریں۔

انہوں نے بلوچستان کے انسداد دہشت گردی شارٹ فلم مقابلے کے جیتنے والوں کو مبارکباد دی، جو وائس آف بلوچستا کے زیر اہتمام منعقد ہوا تھا۔ مقابلے میں پہلی پوزیشن مشاہد شان ضلع مستونگ، دوسری سیف الاسلام ضلع لسبیلہ اور تیسری پوزیشن پیام خروٹی ضلع ژوب کے حصے میں آئی ۔