سانحہ مستونگ، اتحاد اہلسنت کی اپیل پر کوئٹہ میں شٹر ڈاؤن ہڑتال کا اعلان

کوئٹہ(قدرت روزنامہ)بلوچستان کے ضلع مستونگ میں 12 ربیع الاول کو ہونے والے افسوسناک سانحے کے پیشِ نظر آج کوئٹہ میں شٹرڈاؤن ہڑتال کا اعلان کیا گیا ہے۔
تفصیلات کے مطابق اتحادِ اہلسنت کی اپیل پر آج کوئٹہ میں شٹر ڈاؤن ہڑتال کا اعلان کیا گیا۔ ہڑتال کے موقع پر تمام دکانیں اور کاروباری مراکز بند رہیں گے۔ ہڑتال کے باعث سڑکوں پر ٹریفک کم اور سیکیورٹی کے سخت انتظامات کیے گئے ہیں۔
اتحاد اہلسنت نے مطالبہ کرتے ہوئے کہا ہے کہ سانحہ مستونگ میں ملوث ملزمان کو گرفتار کرکے سزا دی جائے۔خیال رہے کہ 12 ربیع الاول کو مستونگ میں عید میلاد النبی ﷺ کے جلوس میں خودکش دھماکے سے اب تک 55 افراد جان کی بازی ہار بیٹھے ہیں۔
ترجمان سی ٹی ڈی کے مطابق خودکش حملے کی تحقیقات جاری ہیں، حملہ آور کی شناخت کیلئے نادرا سے رابطہ کر لیا گیا ہے۔ حملہ آور کے اعضاء ڈی این اے کیلئے بھجوائے جا رہے ہیں۔ اب تک کوئی گرفتاری عمل میں نہیں لائی جاسکی۔