نصیرآباد، بلوچستان فوڈ اتھارٹی کی کارروائی، بھاری مقدار میں ملاوٹی دودھ تلف

نصیرآباد(قدرت روزنامہ) دودھ میں ملاوٹ کرنے والے عناصر کے خلاف بلوچستان فوڈ اتھارٹی ( بی ایف اے ) کا نصیرآباد کے مختلف علاقوں میں کریک ڈاؤن،جدید موبائل لیبارٹری کے ذریعہ ملک سیمپلز کی آن دی اسپاٹ ٹیسٹنگ ، 7 مراکز کا دودھ ملاوٹی ثابت ہوگئی۔ ملاوٹی و غیر صحت بخش دودھ کی بڑی مقدار تلف ، ملک شاپس پر جرمانے عائد کردیے گئے ہیں،صفائی و اشیاء اسٹوریج کے انتظامات بارے 10 مراکز کو وارننگ نوٹسز جاری کر دیے گئے ہیں۔انسپیکشن کے دوران اسسٹنٹ کمشنر نصیر آباد بھی بی ایف اے حکام کے ہمراہ موجود رہے ۔ ملک شاپس مالکان کو دودھ کی مقدار بڑھانے کیلئے پانی و اسکمڈ ملک پاؤڈر کی آمیزش پر جرمانہ کیا گیا۔ علاوہ ازیں بی ایف اے انسپیکشن ٹیم نے ڈپٹی کمشنر نصیر آباد بتول اسدی کے ہمراہ 1 آئس فیکٹری کا بھی معائنہ کیا۔ بی ایف اے انسپیکشن ٹیم کے مطابق فیکٹری میں صفائی و برف کی تیاری اور اسٹوریج کا عمل مجموعی طور پر ایس او پیز کے برخلاف پایا گیا۔