حنا الطاف اور آغا علی کی علیحدگی سے متعلق افواہیں زیرِ گردش

کراچی (قدرت روزنامہ)پاکستان شوبز انڈسٹری کی معروف جوڑی، اداکارہ حنا الطاف اور اداکار و میزبان آغا علی کے درمیان علیحدگی سے متعلق افواہیں زیرِ گردش ہیں۔
آغا علی آج کل یورپی ملک یونان میں سیرو و تفریح میں مگن اپنی نت نئی خوبصورت مقامات سے تصاویر شیئر کر رہے ہیں، اِن تصاویر میں اُن کی اہلیہ حنا الطاف غائب ہیں۔

اداکار کی جانب سے شیئر کی گئیں تصاویر میں اِنہیں تنہا گھموتے پھرتے اور خوشگوار موڈ میں دیکھا جا سکتا ہے۔اِن تصویروں کے کیپشن بھی معنی خیز ہیں جبکہ پوسٹس میں بھی حنا الطاف کا کہیں ذکر موجود نہیں ہے۔
آغا علی کا اکیلے بیرونِ ملک سیر و تفریح پر جانا اور حنا الطاف کا ساتھ نہ ہونا اس جوڑی کے مداحوں کو تشویش میں مبتلا کر رہا ہے۔سوشل میڈیا پلیٹ فارمز پر آغا علی اور حنا الطاف کے درمیان علیحدگی کی چہ مگوئیاں جاری ہیں۔

آغا علی کی اِن تصاویر پر اس جوڑی کے مداح کمنٹس کے ذریعے اداکار سے اہلیہ حنا الطاف کا پوچھ رہے ہیں جبکہ کچھ انسٹاگرام صارفین کا دعویٰ ہے کہ اس جوڑی کے درمیان علیحدگی ہو چکی ہے۔
سوشل میڈیا صارفین اِن تصویروں کے کمنٹ باکس میں اداکار سے اہلیہ سے متعلق سوالات کر رہے ہیں۔مداحوں کا آغا علی سے پوچھنا ہے کہ حنا الطاف کہاں ہیں؟ اور وہ تنہا کیوں چھٹیاں گزار رہے ہیں۔

ان افواہوں سے متعلق تاحال اس جوڑی کی جانب سے کوئی تصدیق یا تردید سامنے نہیں آئی ہے۔
واضح رہے کہ اداکار آغا علی کے انسٹاگرام اکاؤنٹ پر اگر نظر دوڑائی جائے تو انہوں نے اہلیہ کے ہمراہ پوسٹ کی گئی سب ہی تصاویر ڈیلیٹ کر دی ہیں جبکہ اُن کی دیگر اداکاراؤں کے ہمراہ تصاویر دیکھی جا سکتی ہیں۔
یاد رہے کہ آغا اور حنا کے درمیان علیحدگی کی خبریں گزشتہ سال سے زیرِ گردش ہیں، جوڑی نے گزشتہ سال اپریل میں ایسی خبروں کو مسترد کر دیا تھا۔