’پارٹی چھوڑنے کی غلطی تسلیم کرتا ہوں‘ بلوچستان میں مسلم لیگ ن کا پرانا ساتھی سینکڑوں ساتھیوں سمیت دوبارہ پارٹی میں شامل ہوگیا

کوئٹہ(قدرت روزنامہ)بی اے پی کے صوبائی سیکرٹری اطلاعات چودھری شبیر اور مرکزی رہنما میر ظفر قمبرانی سیکڑوں ساتھیوں سمیت مسلم لیگ ن میں شامل ہوگئے .

پاکستان مسلم لیگ ن بلوچستان کے زیراہتمام مختلف جماعتوں کے کارکنوں کی ن لیگ میں شمولیت کیلئے جلسے کا انعقاد کیا گیا، مسلم لیگ ن بلوچستان کے صدر شیخ جعفر کی موجودگی میں چودھری شبیر اور میر ظفر قمبرانی نے مسلم لیگ ن میں شمولیت کا اعلان کیا .

چودھری شبیر نے جلسہ سے خطاب کرتے ہوئے کہا کہ پہلے بھی مسلم لیگ ن سے وابستہ تھا، اب دوبارہ شامل ہوکر فخر محسوس کر رہا ہوں، مسلم لیگ ن چھوڑنے کی اپنی غلطی کو تسلیم کرتا ہوں، بلوچستان میں مسلم لیگ ن کے قافلے کو مزید آگے بڑھائیں گے .

میر ظفر قمبرانی نے خطاب کرتے ہوئے کہا کہ بلوچستان میں ن لیگ ہی عوام کے حقیقی مسائل حل کرے گی، مسلم لیگ ن کو کوئٹہ کی قدیم آبادیوں میں پذیرائی حاصل ہے مگر ماضی میں مناسب نمائندگی نہیں ملی، بے روز گاری اور تعلیم کے فقدان نے لوگوں کو پریشان کر رکھا ہے .