پنجاب بھر میں سموگ ایمرجنسی نافذ کر دی گئی

اسلام آباد (قدرت روزنامہ)وزیر اعلیٰ پنجاب کی زیر صدارت انسداد اسموگ کے حوالے سے اجلاس ہوا۔
تفصیلات کے مطابق اجلاس کے دوران پنجاب بھر میں سموگ ایمرجنسی نافذ کر دی گئی ہے۔
ماہرین ماحولیات نے اسموگ سے متعلق اجلاس میں بریفنگ دی ۔
ماہرین ماحولیات کا کہنا ہے کہ اسکولوں میں چھٹی اور ٹرانسپورٹ بند کرنے سے فرق نہیں پڑے گا۔
ایک ماہ کیلئے تمام سرکاری و نجی ا سکولوں میں طلبا و طالبات کیلئے ماسک لازمی قرار دیدیا گیا ہے۔
نگران وزیر اعلیٰ محسن نقوی کا کہنا ہے کہ طلباو طالبات کی صحت کے لیے ماسک لازمی قرار دیا گیا ہے۔
عوام سے بھی اپیل ہے کہ وہ ماسک کا استعمال کریں،صوبائی وزراء کو کل سے سرکاری و نجی اسکولوں کے دورے کرنے کی ہدایت کی گئی ہے۔
گھروں کی تعمیر کے دوران مٹی، ریت اور ملبہ پر چھڑکاؤ نہ کرنے والوں کیخلاف کارروائی ہوگی۔
کمشنر لاہور ڈویژن، محکمہ بلدیات اور لاہور ویسٹ مینجمنٹ کمپنی کو بھی ہدایات جاری کی گئی ہیں۔
اسموگ کے دوران کاشتکاروں کے خلاف چالان واپس لینے کا حکم دیا گیا ہے۔وزیر اعلیٰ محسن نقوی نے اس ضمن میں ایڈیشنل چیف سیکرٹری داخلہ کو ہدایات دیں۔
محسن نقوی کا کہنا ہے کہ کاشتکار بھائی فصلوں کی باقیات نہ جلائیں بلکہ انہیں مناسب طریقے سے تلف کریں۔
دھواں چھوڑنے والی گاڑیوں اور فیکٹریوں کیخلاف بلاامتیاز کارروائی جاری رکھی جائے۔