ریاض:نگران وزیراعظم کی سعودی ولی عہد شہزادہ محمد بن سلمان سے ملاقات
ریاض (قدرت روزنامہ) سعودی ولی عہد و وزیراعظم شہزادہ محمد بن سلمان بن عبدالعزیز آل سعود سے نگران وزیراعظم انوار الحق کاکڑنے ریاض میں ملاقات کی .
اس موقع پرغزہ کی تازہ ترین صورت حال اورباہمی دلچسپی کے امور پرتبادلہ خیال کیا گیا .
نگران وزیراعظم انوار الحق کاکڑ نے سعودی ولی عہد کی مدبرانہ قیادت میں فلسطینی کاز کو فروغ دینے کے لیے سعودی عرب کے کردار اور کوششوں کو سراہا . انہوں نے مقبوضہ فلسطینی علاقوں میں بگڑتی ہوئی صورت حال پر مشترکہ عرب اسلامی ایکشن کو تیار کرنے کے لیے سربراہی اجلاس بلانے کے بروقت اقدام پر سعودی قیادت کا شکریہ ادا کیا .
دونوں رہنماؤں نے اسرائیل کو محصور اور معصوم فلسطینیوں کے خلاف وحشیانہ اور اندھا دھند جارحیت سے روکنے کے لیے فوری بین الاقوامی تعاون کی ضرورت پر زور دیا . انہوں نے مقبوضہ غزہ کی ناکہ بندی ہٹانے کی فوری ضرورت پر زور دیا تاکہ متاثرہ آبادی کو اہم انسانی امداد اور طبی امداد کی فراہمی میں آسانی ہو .
انوار الحق کاکڑنے اسپتالوں، مہاجرین کیمپوں، اسکولوں اور رہائشی عمارتوں پر بمباری کے اسرائیلی اقدام کی مذمت کی جس کے نتیجے میں 10 ہزار سے زائد قیمتی جانیں ضائع ہوئیں . انہوں نے اسرائیل فلسطین تنازع کے منصفانہ اور پائیدار حل کے لیے پاکستان کے غیر متزلزل عزم کو بھی اجاگر کیا، جس کی بنیاد دو ریاستی حل پر مبنی ہے جس کی سرحدوں کے ساتھ ایک آزاد، خودمختار اور قابل عمل فلسطینی ریاست کا قیام ممکن ہو گا جو جون 1967 اور القدس الشریف سے پہلے موجود تھیں .
دونوں رہنماؤں نے دوطرفہ امور پر بھی تبادلہ خیال کیا اور باہمی طور پر فائدہ مند اقتصادی شراکت داری کیلئے پاکستان سعودی عرب کے دیرینہ تعلقات کو مزید مضبوط بنانے کے عزم کا اعادہ کیا .
یاد رہے کہ انوارالحق کاکڑ تین روزہ سرکاری دورے پر جمعہ کے روز سعودی عرب پہنچے تھے جہاں ان کا استقبال نائب گورنر ریاض شہزادہ محمد بن عبدالرحمان نے کیا .
وزیراعظم انوارالحق کاکڑ اتوار کے روز ریاض میں منعقد ہونے والی اسلامی تعاون تنظیم کے غیرمعمولی سربراہ اجلاس میں شرکت کریں گے جو غزہ کی صورت حال پر منعقد کیا جارہا ہے .
