امن،بھائی چارہ، عزت و احترام پشتون قوم کی ثقافت کا حصہ ہیں، جمال شاہ کاکڑ

کوئٹہ(قدرت روزنامہ)پاکستان مسلم لیگ(ن) کے صوبائی صدر وسابق اسپیکر جمال شاہ کاکڑ نے کہا ہے کہ امن،بھائی چارہ، عزت و احترام پشتون قوم کی ثقافت کا حصہ ہیں،پاکستان مختلف قومیتوں کی فیڈریشن ہے ہر قوم پر دوسری قوم کا احترام فرض ہے ہمیں ملکر اتحاد و اتفاق کے ساتھ چلتے ہوئے ملک و قوم کی ترقی کرنے لئے جدوجہد کرنی ہوگی، یہ بات انہوں نے پشتون ثقافت کے عالمی دن کے موقع پر اپنے بیان میں کہی، انہوں نے دنیا بھر میں بسنے والی پشتونوں کو یوم ثقافت کی مبارکباد دیتے ہوئے کہا کہ آج دنیا بھر میں پشتون قوم کی شناخت زندہ رکھنے میں ہر ایک پشتون کا اہم کردار ہے انہوں نے کہا کہ ثقافت ہمیں امن،عزت، احترام،اتحاد و اتفاق کا درس دیتی ہے تاریخ سے ثابت ہے کہ پشتون امن پسند ہیں لیکن اپنی عزت و ناموس پر کبھی سمجھوتہ نہیں کرتے اور یہی ثقافت ہمارا اثاثہ ہے انہوں نے کہا کہ پاکستان میں پشتون، بلوچ، سندھی، پنجابی سمیت دیگر اقوام آباد ہیں تمام اقوام پر دوسری اقوام کا احترام فرض ہے وقت کی اہم ضرورت یہ ہے کہ ہم اپنی روایات پر قائم و دائم رہتے ہوئے اتفاق و اتحاد کا مظاہرہ کریں اور ہم آہنگی سے ملک کو آگے لیکر جائیں انہوں نے کہا کہ اگر ہم اتفاق و اتحاد سے چلیں تو وہ دن دور نہیں جب ملک ترقی کی راہ پر گامزن ہوگا اور ہمارا شمار دنیا کی بہترین اقوام میں ہوگا