قوم پرست جماعتوں کے قائدین نے لاپتہ افراد کو ہمیشہ سیاسی فوائد حاصل کرنے کے لیے استعمال کیا ہے، جمال رئیسانی

کوئٹہ(قدرت روزنامہ) پاکستان پیپلزپارٹی کے رہنما ءسابق صوبائی وزیر نوابزادہ میر جمال رئیسانی نے کہا ہے کہ قوم پرست جماعتوں کے قائدین نے لاپتہ افراد ، بلوچستان کے احساس محرومی اور پسماندگی کو ہمیشہ سیاسی فوائد حاصل کرنے کے لئے استعمال کیا ہے، انتخابات کے قریب آتے ہی قوم پرست لیڈر اپنے بیانیے کو بھلا بیٹھے ہیں، بلوچستان کے عوام جان چکے ہیں کہ انکے مسائل کو حل کرنے میں قوم پرست رہنماوں کو کوئی دلچسپی نہیں۔ یہ بات انہوں نے اپنے ایک بیان میں کہی۔ انہوں نے کہا کہ لاپتہ افراد کے نام پر ووٹ لینے والے لوگ ان دنوں کہیں دیکھائی نہیں دے رہے ہیں
بلوچ نوجوانوں اور صوبے کے معصوم عوام کو ہمیشہ قوم پرستوں نے ورغلانے کی کوشش کی اور انہی کے ناموں پر مراعات و اقتدار حاصل کیا ہے انہوں نے کہا کہ وقت آگیا ہے کہ عوام اپنے حقیقی اور ترقی پسند نمائندوں اور قوم کو غفلت میں رکھ کر اقتدار حاصل کرنے والوں میں فرق کریں بلوچستان کے باشعور عوام اب خوش نما نعرے نہیں ترقی چاہتے ہیں۔ انہوں نے کہا کہ عوام نام نہاد قوم پرستوں کو مسترد کرکے ترقی پسند نمائندوں کا انتخاب کریں گے اور انکے حقیقی نمائندے ہی بلوچستان کو ترقی یافتہ بنائیں گے۔