مزاحمت کار پاکستان کے آئین کو قبول کریں تو قومی دھارے میں شامل کیا جاسکتا ہے، ظہور بلیدی

کوئٹہ(قدرت روزنامہ)پاکستان پیپلز پارٹی کے سابق صوبائی وزیر میر ظہور بلیدی نے سماجی رابطے ویب سایٹ (ایکس) پر اپنے بیان میں کہا ہے کہ کالعدم تنظیم بلوچ نیشنل آرمی کے کمانڈر سرفراز بنگلزئی کا ہتھیار ڈالنا اور اس سے پہلے بی این اے کے سربراہ امام شمبے زئی کا تشدد کا راستہ ترک کرنا اس بات کی عکاسی کرتا ہے کہ ریاست بلوچستان صوبے میں امن، ترقی اور بھائی چارگی کے لئے ناراض بلوچ رہنماوں کو مفاہمت اور مذاکرات کے زریعے قومی دھارے میں لانے کے لئے سنجیدہ ہے۔
دشمن قوتوں کے ساتھ مل کر پاکستان کی ریاست اور عوام کے خلاف گھنانے جرائم میں ملوث ہونے کے باوجود انہیں قومی دھارے میں شامل ہونے کے لیے معاف کر دیا گیا ہے جس سے ثابت ہوتا ہے کہ اگر بلوچ مسلح تنظیموں سے وابسطہ دیگر لوگ تشدد کو ترک کر کے پاکستان کے آئین کو قبول کریں گے تو انہیں بغیر کسی اور شرائط کے قومی دھارے میں شامل کیا جائے گا۔