بلاول نے کراچی کے لیاری کا انتخابی میدان چھوڑ دیا

کراچی (قدرت روزنامہ) چیئرمین پیپلز پارٹی بلاول بھٹو زرداری نے انتخابات 2024 میں لیاری کا انتخابی میدان چھوڑ دیا۔چیئرمین پیپلز پارٹی نے کراچی میں کسی بھی نشست سے کاغذات نامزدگی جمع نہیں کروائے۔واضح رہے کہ لیاری سے قومی اسمبلی کی نشست بھٹو خاندان کی آبائی نشست جانی جاتی ہے بلاول بھٹو زرداری نے 2018 میں لیاری سے ہی انتخابی سیاست کا آغاز کیا تھا۔
1988 میں بینظیر بھٹو لیاری سے الیکشن لڑ چکی ہیں، آصف علی زرداری 1993 میں لیاری سے الیکشن لڑ چکے ہیں جبکہ ذوالفقار علی بھٹو نے بھی لیاری کی نشست پر عام انتخابات میں حصہ لیا تھا۔ تاہم لاہور کے حلقہ این اے 128 کے لیے پیپلز پارٹی کے چیئرمین بلاول بھٹو زرداری کے کاغذات جمع کرائے گئے، جہاں مسلم لیگ ن کے خواجہ احمد حسان، جماعت اسلامی کے لیاقت بلوچ اور دیگر امیدوار میدان میں ہیں۔
ماضی کے کئی بڑے نام آئندہ برس 8 فروری کو ہونے والے عام انتخابات میں حصہ نہیں لے رہے ۔سابق وزیراعظم چودھری شجاعت حسین، لیگی رہنما شاہد خاقان عباسی، سابق وزیر خزانہ مفتاح اسماعیل الیکشن میں حصہ نہیں لیں گے۔ سابق چیئرمین سینیٹ نیئر بخاری، سابق وفاقی وزراء اسدعمر، علی نواز اعوان، علی زیدی، خسرو بختیار، صداقت عباسی، عمران اسماعیل اورف رخ حبیب بھی اگلے برس انتخابات میں حصہ نہیں لیں گے۔