ہمارے ساتھ بہت زیادتیاں ہوئیں،اب سیز فائر ہونا چاہیے،بیرسٹرگوہر

بونیر (قدرت روزنامہ)رہنما تحریک انصاف بیرسٹر گوہر علی خان نے کہا کہ ہمارے ساتھ بہت زیادتیاں ہوئیں ،میری درخواست ہے اب تمام جھگڑے ختم اور سیز فائر ہونا چاہیے۔

انہوں نے بونیرمیں کارکنوں سے خطاب کرتے ہوئے کہا کہ 175 سیاسی جماعتوں میں سب سے زیادہ بہترین انتخاب ہم نے کیا۔

بیرسٹر گوہر علی خان نے کہا کہ مولانا فضل الرحمان کے 40/40 کے کمرے میں ہونے والے انٹرا پارٹی الیکشن قبول ہیں، زرداری کے ڈرائنگ روم میں بھی انٹرا پارٹی الیکشن قبول ہیں، مسلم لیگ ن نے کسی صوبے میں انٹراپارٹی الیکشن نہیں کرایا، دونوں پارٹیوں نے صرف 4 بندوں کا انتخاب کرایا وہ انٹرا پارٹی الیکشن قبول ہیں۔

رہنما پی ٹی آئی نے کہا کہ تحریک انصاف کے بھرے مجمع میں کرائے گئے انٹرا پارٹی الیکشن قبول نہیں، بلے کے نشان کو ہم دوبارہ بحال کرائیں گے، ہمیں عدلیہ اور ریاستی اداروں سے بہت شکوے ہیں لیکن ہم نے ہمیشہ عدلیہ پر اعتماد کیا۔یہ ملک مزید کسی تجربے کا متحمل نہیں ہوسکتا، عوام جو فیصلہ کرے گی ہمیں منظور ہوگا، کارکنوں سے گزارش ہے جس طرح اب تک صبراور تحمل کا مظاہرہ کیا گیا 8 فروری کو بھی اسی طرح صبروتحمل کا مظاہرہ کریں۔

انہوں نے کہا کہ میری درخواست ہے 8 فروری کو عوام کی آواز کا راستہ نہ روکا جائے۔