عوام کی مشکلات کے حل کیلئے سیاسی قوتوں کو ایک ہونا ہوگا، شہبازشریف

لاہور (قدرت روزنامہ)پاکستان مسلم لیگ ( ن ) کے صدر شہباز شریف نے کہا ہے کہ عام انتخابات میں مسلم لیگ (ن) سب سے بڑی جماعت بن کر ابھری ہے، تمام سیاسی قوتوں کو پاکستان کے لیے ایک ہونا ہوگا .
حکومت سازی کے حوالے سے بلائے گئے اہم پارٹی اجلاس سے خطاب کرتے ہوئے انہوں نے کہا کہ اللہ تعالیٰ کے کرم اور عوام کی حمایت سے مسلم لیگ (ن) عام انتخابات میں سب سے بڑی جماعت بن کر ابھری ہے، عوام کی توقعات پر پورا اتریں گے .

حکومت کا ہدف عوام کو مہنگائی اور مسائل سے نجات دلانا ہوگا، لیگی رہنما نے مزید کہا کہ تمام سیاسی قوتوں کو پاکستان کے لیے ایک ہونا ہوگا .

اجلاس میں سینیٹر اسحاق ڈار، خواجہ سعد رفیق، سردار ایاز صادق، مریم اورنگزیب، ملک محمد احمد خان، سینیٹر اعظم نذیر تارڑ، عطاء اللہ تارڑ اور خواجہ عمران نزیر شریک تھے .
اجلاس میں حکومت سازی کے حوالے سے امور پر تبادلہ خیال کیا گیا، شہباز شریف نے قائد محمد نواز شریف کی ہدایت پر مختلف جماعتوں سے ہونے والے رابطوں کے بارے میں اجلاس کو آگاہ کیا، اجلاس میں حکومت سازی کے لیے مختلف آپشنز پر مشاورت کی گئی . دوران اجلاس پارٹی رہنماؤں نے 8 فروری کے انتخابات میں کامیابی پر پارٹی صدر کو مبارک باد دی .