اسحاق ڈار آؤٹ، وزارت خزانہ مصدق ملک کو ملنے کا امکان

اسلام آباد(قدرت روزنامہ)وزیراعظم شہبازشریف نے وفاقی کابینہ کی تشکیل کیلئے مشاورت کا عمل شروع کر دیاہے اور جلد ہی حتمی اعلان متوقع ہے تاہم دعویٰ کیا جارہاہے کہ وزارت خزانہ اس بار اسحاق ڈار کی بجائے مصدق ملک کو ملنے کا امکان ہے ۔

نجی ٹی وی “جیونیوز “نے ذرائع سے دعویٰ کیاہے کہ احد چیمہ کو وزیراعظم کا مشیر لگائے جانے کا امکان ہے جبکہ عطا ءتارڑ کو وزیر اطلاعات و نشریات، خواجہ آصف کو وزیر دفاع، اسحاق ڈار کو وزیر خارجہ، احسن اقبال کو وزیر منصوبہ بندی و ترقیات بنائے جانے کا امکان ہے ۔

ان کے علاوہ رانا تنویر، شیزا فاطمہ ، چوہدری بشیر چیمہ، چوہدری سالک حسین بھی کابینہ کا حصہ ہوں گے ۔ اتحادی جماعت ایم کیوایم کو 2 وزارتیں دی جائیں گی جبکہ عبدالعلیم خان بھی وفاقی کابینہ میں شامل ہوں گے ۔

پاکستان پیپلز پارٹی پہلے مرحلے میں وفاقی کابینہ کا حصہ نہیں بنے گی تاہم دوسرے مرحلے میں وزارتیں لینے کا امکان ہے ۔