سائفر اگر تھا ہی نہیں تو بانی پی ٹی آئی کو سزا کیوں دی، علی امین گنڈاپور

اسلام آباد(قدرت روزنامہ)وزیراعلیٰ خیبرپختونخوا علی امین گنڈاپورکا کہنا ہے کہ ڈونلڈلو سچ اگر بول رہے ہیں تو سائفر تھا کیا؟سائفر اگر تھا ہی نہیں تو بانی پی ٹی آئی کو سزا کیوں دی .

اسلام آباد میں عدالت پیشی پر میڈیا سے گفتگو کرتے ہوئے علی امین گنڈاپور نے کہاکہ سائفر سے متعلق ڈونلڈلو کے بیان کی سفیر نے تصدیق کی تھی،سائفر سازش تھی، اب بھی بیان پر کھڑے ہیں،غیرت مند پاکستانی کے گھر میں مداخلت بھی ہو تو سازش ہے،اسد مجید کو بلاکر پوچھا جائے کہ بات چیت نہیں ہوئی تو سائفر کس نے بھیجا،ڈونلڈلو سچ اگر بول رہے ہیں تو سائفر تھا کیا؟سائفر اگر تھا ہی نہیں تو بانی پی ٹی آئی کو سزا کیوں دی،ملک کے اندر کسی کی مداخلت برداشت نہیں کریں گے،ان کاکہناتھا کہ خیبرپختونخوا میں عوام کے مسائل حل کر رہے ہیں،وفاق نےپیسے دینے ہیں، خیبرپختونخوا کا حق ہے .

علی امین گنڈاپور نے کہاکہ مینڈیٹ چوری کرکے حکومت بنی، عوام نے انہیں ووٹ نہیں دیا،تاریخ کی بدترین دھاندلی ہوئی ، پی ٹی آئی کی 180سیٹیں چوری ہوئیں،عوام کی سپورٹ حکومت کے ساتھ نہیں، کیا ڈیلیور کریں گے، بانی پی ٹی آئی کبھی ڈیل نہیں کریں گے،ملک کے ساتھ جو تجربہ کیا گیا اس نے عوام کو نقصان پہنچایا،وزیراعظم خود فارم 47والے ہیں، میں ان سے کیا بات کروں ؟