آج پنڈورا لیکس نے عمران احمد نیازی کا پنڈورا کھول دیا ہے، احسن اقبال
انہوں نے کہا ہے کہ لیکس ابھی آئی نہیں ترجمانوں نے صفائیاں دینی شروع کردی ہیں، اس سے صاف پتا چلتا ہے کہ چور کی داڑھی میں تنکا ہے، ترجمان کہتے ہیں تحائف کی تفصیل سے عرب ممالک کے سربراہ ناراض ہو جائیں گے، عرب ممالک کے سربراہ کیوں ناراض ہوں گے، انہوں نے کوئی سستے تحفے تو نہیں دیئے، مسئلہ صرف یہ ہے کہ تفصیل بتانے سے کپتان کی چوری پکڑی جائے گی . احسن اقبال نے کہا ہے کہ کتنے شرم کی بات ہے آج سوشل میڈیا گھڑی بیچنے کی کہانیوں سے بھرا پڑا ہے، یہ کہانی ہر پاکستانی کے لیے باعث شرم ہے، تحقیقات ہونی چاہیے، اگر یہ بات درست ہے تو عمران نیازی کو فوری مستعفیٰ ہونا چاہیے . مسلم لیگ ن کے جنرل سیکرٹری کا کہنا ہے کہ تحائف کی تفصیل نہ بتانا دراصل عمران نیازی کا اقرار جرم ہے، اس سے پتہ چلتا ہے کہ دال میں کالا نہیں، بلکہ دال میں سوپر کالا ہے، بڑا ایماندار بنتا تھا، ایمانداری کا لبادہ اوڑھ کر عوام کو بے وقوف بنایا گیا، اس کرپٹ، نااہل اور نالائق حکومت کو اقتدار میں رہنے کا کوئی حق نہیں ہے . احسن اقبال نے کہا ہے کہ اسمبلی اجلاس میں مسلسل آٹھ دن کورم توڑ کے ارکان اسمبلی نے وزیر اعظم پر عدم اعتماد کردیا ہے، میں صدر پاکستان مطالبہ کرتا ہوں وزیر اعظم کو دوبارہ اعتماد کا ووٹ لینے کا حکم جاری کریں . مسلم لیگ ن کے جنرل سیکرٹری احسن اقبال نے مزید کہا ہے کہ الیکشن چرانے کی ان کی اسکیم کو کامیاب نہیں ہونے دیں گے، پاکستانی عوام مہنگائی، بے روزگاری اور مایوسی کا ان سے ووٹ کے ذریعے انتقام لے گی، آئندہ الیکشن میں ان کی ضمانتیں ضبط ہوں گی . . .
