وزیر اطلاعات عظمیٰ بخاری کی صدر پنجاب اسمبلی پریس گیلری اخلاق باجوہ کے گھر آمد

لاہور (قدرت روزنامہ ) صوبائی وزیر اطلاعات و نشریات پنجاب عظمیٰ بخاری صدر پنجاب اسمبلی پریس گیلری اخلاق باجوہ کے گھر تشریف لائیں . عظمیٰ بخاری نے اخلاق باجوہ کو پھولوں کا گلدستہ پیش کیا اور صحت یابی کی دعا کی .

اس موقع پر صوبائی وزیرِ اطلاعات پنجاب نے کہا کہ حکومت آپکے ہر مشکل وقت میں مکمل تعاون کرے گی . جو کچھ پنجاب حکومت سے ہوسکا وہ آپ اور آپ کے اہلخانہ کےلئے کیاجائےگا . پوری امید ہے آپ جلد صحتیاب ہوکر اپنی صحافتی ذمہ داریاں نبھائیں گے . جس باہمت طریقے سے آپ بیماری سے لڑ رہے ہیں اللہ آپکو جلد صحت یاب کرے گا . آپ نے ہمیشہ پنجاب اسمبلی کی رپورٹنگ میں نمایاں اور فعال کردار ادا کیا .

صدر پریس گیلری اخلاق باجوہ نے صوبائی وزیر عظمیٰ بخاری کا اپنے گھر آمد پر شکریہ ادا کیا . انکا کہنا تھا کہ مشکل کی اس گھڑی میں پنجاب حکومت نے میرا بہت ساتھ دیا ہے . جلد صحت یاب ہوکر اپنی ذمہ داریاں سنبھال لوں گا .