ریلوے کے اہم ترین منصوبے ایم ایل ون کی منظوری

اسلام آباد (قدرت روزنامہ)سینٹرل ڈویلپمنٹ ورکنگ پارٹی (سی ڈی ڈبلیو پی) نے ریلوے کے اہم ترین منصوبے ایم ایل ون کی منظوری دے دی۔
سی ڈی ڈبلیو پی نے 6.7 ارب ڈالر کے ایم ایل ون منصوبے کے پی سی ون منصوبے کی منظوری دیتے ہوئے اسے حتمی فیصلے کے لیے قومی اقتصادی کونسل کی ایگزیکٹو کمیٹی (ایکنک) کو بھجوا دیا ہے۔
ڈپٹی چیئرمین پلاننگ کے زیرصدارت سی ڈی ڈبلیو پی کے اجلاس میں ٹرانسپورٹ اور مواصلات، زراعت و خوراک، تعلیم، توانائی، صحت، اعلیٰ تعلیم، انفارمیشن ٹیکنالوجی فزیکل پلاننگ اور ہاؤسنگ شعبہ سے متعلق منصوبہ جات زیر غور آئے۔

گلگت بلتستان اور آزاد کشمیر میں دانش اسکولوں کی تعمیر کا منصوبہ
سی ڈی ڈبلیو پی نے ایم ایل ون کے علاوہ 3 دیگر منصوبے بھی حتمی منظوری کے لیے ایکنک کو بھجوائے جن میں 9239.5 ملین روپے مالیت کا میر پور اسلام گڑھ روڈ پر رٹھوعہ ہریام پل کی تعمیر کا منصوبہ، 14927.5 ملین روپے سے آزاد جموں و کشمیر اور گلگت بلتستان میں 3، 3 دانش اسکولوں کی تعمیر کا منصوبہ اور 58079.85 ملین روپے مالیت کا مظفر آباد مانسہرہ ایکسپریس وے کی تعمیر کا منصوبہ شامل ہے۔

علاوہ ازیں، سی ڈی ڈبلیو نے 23 ارب روپے کے 7 ترقیاتی منصوبوں کی بھی منظوری دی۔ سی ڈی ڈبلیو پی کی جانب سے منظور کیے گئے منصوبوں میں آزاد جموں و کشمیر ویمن یونیورسٹی باغ کے قیام، نیشنل ہیلتھ سپورٹ پروگرام خیبرپختونخوا کے قیام، زرعی اصلاحات سے متعلقہ منصوبہ، فلکیاتی مشاہدے سے متعلق منصوبہ اور اسلام آباد ٹیکنو پولس کے انفراسٹرکچر کی تعمیر کا منصوبہ شامل ہے۔