چاہت فتح علی خان کا ’بدوبدی‘ دلجیت دوسانجھ کی وجہ سے وائرل ہوا؟

اسلام آباد (قدرت روزنامہ)گلوکار چاہت فتح علی خان کی جانب سے حال ہی میں ریلیز کیے گئے پنجابی گانے ’اکھ لڑی بدوبدی‘ کی ویڈیو تیزی وائرل ہورہی ہے۔ گلوکار نے گزشتہ ہفتے ’اکھ لڑی بدوبدی‘ کی ویڈیو اپنے یوٹیوب اور انسٹاگرام پر ریلیز کی تھی، جس کے بعد ان کا گانا وائرل ہوا۔ کہا جا رہا ہے کہ اس گانے کی شہرت میں بھارتی پنجابی اسٹار دلجیت دوسانجھ کا اہم کردار ہے۔
چاہت فتح علی خان کے ’بدوبدی‘نے دلجیت دوسانجھ کا دل بھی جیت لیا۔ دلجیت دوسانجھ نے بھی اپنی مزاحیہ ویڈیو جاری کردی جو دیکھتے ہی دیکھتے وائرل ہوگئی۔ دلجیت نے انسٹاگرام پر لگائی گئی رِیل کا آغاز ’آئے ہائے اوئے ہوئے، بدو بدی‘ سے کیا اور پھر اس کے بعد دلچسپ انداز میں ادھر ادھر گھومتے ہوئے نظر آئے، گھومنے پھرنے کی ویڈیو کو مزاحیہ انداز میں الفاظ سے نوازا۔
چاہت فتح علی خان کے گانے کی ویڈیو کو پاکستان سمیت بھارت کے متعدد شوبز سوشل میڈیا پیجز سمیت شوبز ویب سائٹس پر بھی شیئر کیا گیا اور لوگوں نے ان کی پرفارمنس پر دلچسپ تبصرے کیے۔
شائقین نے ’اکھ لڑی بدوبدی‘ کے بجائے چاہت فتح علی خان کے ڈانس اور ان کے ساتھ ویڈیو میں نظر آنے والی ماڈل پر تبصرے کیے اور ماڈل کو مشورے دیے کہ وہ گلوکار سے دور رہیں تو بہتر ہے۔
’اکھ لڑی بدوبدی‘ کی ویڈیو کو یوٹیوب سمیت انسٹاگرام پر 2 کروڑ سے زائد بار دیکھا جاچکا ہے اور اس پر شائقین کی جانب سے دلچسپ تبصروں کا عمل بھی جاری ہے۔
چاہت فتح علی خان نے جس پنجابی گانے ’اکھ لڑی بدوبدی‘ کو اپنے منفرد انداز اور آواز میں گایا، اسے پہلی بار ملکہ ترنم نورجہاں نے 1973 میں ریلیز ہونے والی فلم ’بنارسی ٹھگ‘ کے لیے گایا تھا۔
یاد رہے کہ چاہت فتح علی خان کا تعلق پاکستان سے ہے لیکن ان کے پاس برطانوی پاسپورٹ بھی ہے۔ چاہت فتح علی خان نے اپنی زندگی لندن میں گزاری۔ وہ اوبر ڈرائیور اور لندن میں سکیورٹی گارڈ بھی رہے۔ انہوں نے لندن میں کرکٹ بھی کھیلی۔ گلوکار گانے کے شوق کی وجہ سے اپنی برادری میں مشہور تھے۔
’بدوبدی‘ فی الحال بین الاقوامی سطح پر ٹرینڈ کر رہا ہے۔ سوشل میڈیا صارفین، ڈیجیٹل تخلیق کار، گلوکار اور دیگر لوگ ’بدوبدی‘ پر ریلز بنا رہے ہیں۔ یہ گانا ہندوستان میں ٹرینڈ کر رہا ہے اور ان کے مواد تخلیق کار اور مشہور شخصیات اس سے بہت متاثر ہیں۔ وہ سبھی چاہت فتح علی خان کی ریلیں پوسٹ کر رہے ہیں اور ان کے پرانے گانوں کو بھی کھوج رہے ہیں۔