ہفتہ وار مہنگائی کی شرح میں 0.34 فیصد کمی ریکارڈ

اسلام آباد(قدرت روزنامہ) وفاقی ادارہ شماریات کے مطابق ہفتہ وار مہنگائی کی شرح میں 0.34 فیصد کمی ریکارڈ کی گئی ہے۔

ادارہ شماریات کی جانب سے جاری کردہ رپورٹ کے مطابق ملک میں سالانہ بنیاد پر مہنگائی کی شرح 21.31 فیصد ریکارڈ کی گئی ہے۔

رپورٹ کے مطابق گزشتہ ہفتے 12 اشیائے ضروریہ کی قیمتوں میں اضافہ ہوا جبکہ 18 اشیائے ضروریہ کی قیمتوں میں کمی اور 21 میں استحکام رہا۔

بیف، دال چنا، خشک دودھ، چائے، مٹن، گڑ، دہی، دودھ مہنگا ہوا جبکہ چکن، لہسن، گندم آٹا، پیاز، انڈے، دال مسور، ایل پی جی سستی ہوئی۔

رپورٹ میں بتایا گیا کہ سالانہ بنیاد پر پیاز 88 فیصد، سرخ مرچ 70 فیصد مہنگی ہوئی جبکہ لہسن 53 فیصد، ٹماٹر 39 فیصد، نمک 33 اور بیف 24 فیصد مہنگا ہوا۔

ایک سال میں چینی کے نرخوں میں 20 فیصد سے زیادہ اضافہ ریکارڈ کیا گیا۔دال ماش 22 فیصد اور گیس چارجز 570 فیصد تک بڑھ گئے۔