وقت آگیا ہے بابر ، شاہین اور دیگر سینئرز کو اب آرام کروایا جائے،نوجوان کھلاڑیوں کو موقع ملنا چاہئے: عثمان شنواری

اسلام آباد (قدرت روزنامہ ) پاکستان کے ٹیسٹ فاسٹ بولر عثمان خان شنواری نے بھی ٹی ٹوئنٹی ورلڈکپ میں قومی ٹیم کی ناقص پرفارمنس کے بعد سینئر کرکٹرز کو آرام کروانے کا مشورہ دیدیا۔
بائیں ہاتھ کے ٹیسٹ فاسٹ بولر عثمان خان شنواری ان دنوں امریکی ریاست ہیوسٹن میں کلب کرکٹ کھیل رہے ہیں، 30 سال کے عثمان شنواری نے پاکستان کے لئے ایک ٹیسٹ 16 ون ڈے اور 17 ٹی 20 کھیلے ہیں۔ورلڈ کپ میں قومی ٹیم کی ناقص پرفارمنس پر بات چیت کرتے عثمان شنواری نے کہا کہ اب وقت آگیا ہے کہ کپتان بابر اعظم، شاہین آفریدی اور دیگر سینئرز کو آرام کروایا جائے، پاکستان کرکٹ میں نئے اور نوجوان کھلاڑیوں کو موقع ملنا چاہئے لیکن یہ اسی وقت ممکن ہوگا جب سینئرز ، جونیئرز کے لئے راستہ فراہم کریں گے۔عثمان شنواری نے گلہ کیا کہ پاکستان کرکٹ صرف 15 کھلاڑیوں تک محدود ہو کر رہ گئی ہے، یہ کھلاڑی زمبابوے، بنگلہ دیش اور آئرلینڈ کے خلاف بھی باہر نہیں بیٹھ رہے، پھر نئے کھلاڑیوں کو کب اور کہاں موقع ملے گا۔
ان کا کہنا تھا کہ ڈومیسٹک کرکٹرز کو موقع ملنا چاہئے، مواقع نہ ملنے کی وجہ سے کرکٹرز ملک چھوڑ کر جانے پر مجبور ہیں۔ٹیسٹ فاسٹ بولر کا کہنا تھا ان کی کرکٹ ابھی باقی ہے البتہ انہیں نہیں معلوم کہ وہ ٹیم سے کیوں باہر ہیں۔