صوبائی حکومت عوام کی مرضی کے بغیر کوئی آپریشن نہیں ہونے دے گی، علی محمد خان

اسلام آباد (قدرت روزنامہ) تحریک انصاف کے سینئر رہنماعلی محمد خان نے کہا ہے کہ صوبے کے عوام کی مرضی کے بغیر خیبرپختونخوا حکومت کوئی آپریشن نہیں ہونے دے گی۔

میڈیا سے گفتگو کرتے ہوئے رکن قومی اسمبلی علی محمد خان کا کہنا تھا کہ پارلیمان، عوام اور بانی پی ٹی آئی کو مطمئن کیے بغیر کچھ بھی قابل قبول نہیں۔علی محمد خان کا کہنا تھا کہ اسلام آباد ، لاہور ، گوجرانوالہ اور راولپنڈی میں بیٹھ کر خیبرپختونخوا کی حدت کا اندازہ نہیں کیا جا سکتا، آپریشن کے نام پر خیبرپختونخوا کا سماجی ڈھانچہ تباہ ہو چکا ہے ۔ ان کا کہنا تھا کہ خیبر پختونخوا میں پردے کی پابند خواتین در بدر ہوئی ہیں۔انہوں نے مطالبہ کیا کہ کچھ کرنا ہے تو پہلے منصوبہ قومی اسمبلی میں لائیں اور چاہیں تو ان کیمرا اجلاس کریں۔ان کا مزید کہنا تھا کہ بانی پی ٹی آئی اور خیبرپختونخوا کے عوام کو مطمئن کیے بغیر کچھ بھی قابل قبول نہیں۔