موٹروے پر اوورلوڈ نگ کرنے والوں کے ساتھ سختی سے نمٹنے کا فیصلہ

اسلام آباد (قدرت روزنامہ)موٹروے پولیس نے اوورلوڈنگ کرنے والے ٹرانسپورٹرز کے ساتھ سختی سے نمٹنے کا فیصلہ کیا ہے۔
آئی جی موٹروے پولیس سلمان چودھری کی زیر صدارت اجلاس ہوا جس میں وفاقی سیکرٹری مواصلات علی شیر محسود سمیت متعلقہ حکام نے شرکت کی۔ ترجمان موٹروے پولیس کے مطابق اجلاس میں اوورلوڈ نگ کرنےوالے ٹرانسپورٹرز کے ساتھ سختی سے نمٹنے کا فیصلہ کیا گیا۔سیکرٹری مواصلات علی شیر محسود نے ہدایت کی کہ قیمتی انسانی جانوں کو بچانے کےلئے 100فیصد ایکسل لوڈ کنٹرول رجیم پر عملدرآمد یقینی بنایا جائے۔ سیکرٹری مواصلات نے حکام کو ہدایت کی کہ اوورلوڈڈ گاڑیوں کو موٹرویز اور ہائی ویز پر داخلے کی ہرگز اجازت نہ دی جائے، نہ ہی اوورلوڈنگ پر قابو پانے کےلئے کسی سے رعایت برتی جائے۔ اجلاس میں آئی جی موٹروے پولیس سلمان چودھری نے بتایا کہ ایکسل لوڈ کنٹرول رجیم پر 100 فیصد عملدر آمد کےلئے سپیشل سکواڈ تشکیل دیا گیا ہے، زائد وزن والی گاڑیوں سے اضافی سامان اتارا جا رہا ہے جبکہ زونل اور سیکٹر کمانڈرز بھی سرپرائز چیکنگ اور مانیٹرنگ میں مصروف ہیں۔
آئی جی موٹروے کا کہنا تھا کہ مقررہ حد سے زائد وزن والی گاڑیوں کو بھاری جرمانوں کے ساتھ واپس کیا جا رہا ہے، اوور لوڈنگ کرنے والے ٹرانسپورٹرز کے خلاف سخت قانونی کارروائی اور بھاری جرمانے بھی کیے جا رہے ہیں۔