ٹی20 ورلڈ کپ میں قومی ٹیم ناکام کیوں ہوئی؟ وہاب ریاض نے اہم رپورٹ پیش کردی

اسلام آباد (قدرت روزنامہ)کرکٹ ٹیم کے سینیئر منیجر و سلیکٹر وہاب ریاض نے آئی سی سی مینز ٹی20 ورلڈ کپ 2024 میں گرین شرٹس کی ناقص کارکردگی پر مبنی رپورٹ پاکستان کرکٹ بورڈ (پی سی بی) کو جمع کرا دی ہے۔ رپورٹ میں ٹی20 ورلڈ کپ میں قومی ٹیم کی سُپر8 مرحلے تک رسائی میں ناکامی کی وجوہات بتائی گئی ہیں۔
پی سی بی ذرائع کا کہنا ہے کہ وہاب ریاض نے ڈائریکٹر پی سی بی عثمان واہلہ کو رپورٹ جمع کرائی ہے۔ منیجر منصور رانا کی رپورٹ بھی اس کے ساتھ منسلک ہے، وہاب ریاض نے رپورٹ میں ورلڈ کپ میں ٹیم کی ناقص کارکردگی کی وجوہات بتائی ہے اور مستقبل کے لیے تجاویز بھی دی ہیں۔
ذرائع کے مطابق وہاب ریاض نے رپورٹ میں کہا ہے کہ قومی ٹیم نے بھروپر صلاحیت کے مطابق (سکل فل) کرکٹ نہیں کھیلی۔ کھلاڑیوں کو اپنی مہارت کے مطابق کھیلنا چاہیے تھا، کھلاڑیوں میں کو آرڈینیشن اور پلان پر عمل درآمد کا فقدان بھی نظر آیا۔ کھلاڑیوں کو باہمی کوآرڈینیشن اور جذبے کے ساتھ کھیلنا چاہیے تھا۔ بھارت کے خلاف میچ میں جیت کے ارادے کو نہیں چھوڑنا چاہیے تھا۔
وہاب ریاض نے رپورٹ کیا کہ قومی ٹیم ایک جان ہوکر نہیں کھیلی۔ انہوں نے پی سی بی کو مستقبل میں کرکٹ کی بہتری سے متعلق تجاویز بھی دیں۔
واضح رہے کہ قومی ٹیم ٹی20 ورلڈ کپ کے پہلے مرحلے میں ہی باہر ہوگئی تھی۔گرین شرٹس نے آئرلینڈ اور کینیڈا کے خلاف کامیابی حاصل کی جبکہ بھارت اور امریکا سے شکست کا سامنا کرنا پڑا تھا۔