9 مئی واقعات میں پی ٹی آئی کو بیرونی مدد بھی حاصل تھی، رانا ثنا اللہ

اسلام آباد (قدرت روزنامہ)وزیراعظم کے مشیر برائے سیاسی امور رانا ثنا اللہ نے انکشاف کیا ہے کہ 9 مئی کے واقعات میں پی ٹی آئی کو بیرونی مدد بھی حاصل تھی۔
جیو نیوز کے پروگرام نیا پاکستان میں بات چیت کرتے ہوئے رانا ثنااللہ نے کہا کہ 9 مئی کو ملک میں ہنگامہ آرائی اور افراتفری کے لیے پی ٹی آئی کوبیرونی مدد حاصل تھی۔
رانا ثنااللہ کا کہنا تھا کہ پی ٹی آئی نے جوسارا کچھ کیا اس کوبیرونی فنڈنگ حاصل تھی، دشمن ممالک پی ٹی آئی کے ذریعے پاکستان میں افراتفری چاہتے ہیں ،اگر کابینہ نے فیصلہ کیا تو پی ٹی آئی کو بیرونی مدد کے ثبوت بھی پیش کیے جاسکتے ہیں۔
رانا ثنااللہ نے کہا کہ بانی پی ٹی آئی کو عدالت نے اجازت نہیں دی کہ جیل میں سیاسی کانفرنسز،میٹنگز کریں، عمران خان کویہ اجازت نہیں کہ وہ جیل میں رہ کر ایسی منصوبہ بندی کریں کہ باہر افراتفری ہو۔
ان کا کہنا تھا کہ نوازشریف پر بھی پابندی لگائی گئی تھی کہ وہ جیل میں کسی سے نہ مل سکیں۔
انہوں نے مزید کہا کہ پی ٹی آئی کی جانب سے محرم کے آغاز میں جلسہ کرنے کا فیصلہ مناسب نہیں تھا، پی ٹی آئی سیاسی طور پر افراتفری کرنے کے لیے جلسہ کرنا چاہ رہی تھی۔