بالی ووڈ اسٹارز نے امبانی کی شادی پر کیا تحائف دیے؟ فہرست جاری

ممبئی(قدرت روزنامہ) ایشیا کے امیر ترین بھارتی بزنس ٹائیکون مکیش امبانی کے چھوٹے بیٹے اننت امبانی اور رادھیکا مرچنٹ کی شادی پر بالی ووڈ اسٹارز کی جانب سے دیے گئے مہنگے ترین تحائف کی فہرست سامنے آگئی ہے۔
7ماہ قبل شروع ہونے والی اننت امبانی اور رادھیکا مرچنٹ کی شادی کی تقریبات 14 جولائی تک ممبئی میں جاری رہیں جن میں بالی ووڈ اسٹارز اور بھارتی کرکٹرز سمیت دُنیا بھر کی شوبز اور بااثر شخصیات نے شرکت کی۔
ہالی ووڈ، بالی ووڈ، کھیلوں کی دنیا کے اسٹارز اور معروف بین الاقوامی شخصیات نے اننت امبانی اور اُن کی دلہن رادھیکا مرچنٹ کو شادی پر مہنگے ترین تحائف دیے۔بھارت کی اس عالیشان اور مہنگی ترین شادی پر اننت امبانی اور رادھیکا مرچنٹ کو پرائیویٹ جیٹ سے لے کر ساحل سمندر کے ٹکرے سمیت کروڑوں کی مالیت کے دیگر تحائف ملے۔
اب بھارتی میڈیا کی جانب سے اس جوڑے کو ملنے والے تحائف کی فہرست سامنے آئی ہے جس کے مطابق بالی ووڈ کے بِگ بی امیتابھ بچن کے خاندان نے اننت اور رادھیکا کو شادی کے تحفے میں ایک زمرد کا ہار دیا ہے جس کی مالیت بھارتی 30 کروڑ روپے ہے۔
میگا اسٹار شاہ رخ خان اور اُن کی اہلیہ گوری خان نے جوڑے کو فرانس میں 40 کروڑ روپے کی مالیت کا اپارٹمنٹ تحفے میں دیا ہے۔
دبنگ اسٹار سلمان خان نے اپنے شوق کے مطابق، اننت امبانی اور رادھیکا کو تحفے میں اسپورٹس بائیک دی جس کی قیمت بھارتی 15 کروڑ روپے ہے۔
عالیہ بھٹ اور رنبیر کپور نے نئی نویلی جوڑی کو 9 کروڑ روپے کی مالیت کی مرسڈیز کار بطورِ تحفہ دی جبکہ کترینہ کیف اور وکی کوشل نے سونے کی چین دی جس کی قیمت 19 لاکھ روپے بتائی جارہی ہے۔
بہت جلد والدین بننے والے جوڑے رنویر سنگھ اور دیپیکا پڈوکون نے اننت اور رادھیکا کو 20 کروڑ کی مالیت کی رولز رائس تحفے میں دی جبکہ کیارا ایڈوانی اور سدھارتھ ملہوترا نے جوڑے کو اپنے ہاتھ سے بنائی گئی 25 لاکھ روپے کی مالیت کی ایک شال تحفے میں دی۔
اسی طرح اکشے کمار نے اننت اور رادھیکا کو سونے کا قلم تحفے میں دیا جس کی قیمت بھارتی 60 لاکھ روپے بتائی جارہی ہے۔