وزیراعلیٰ خیبرپختونخوا علی امین گنڈاپور کا ارشد ندیم کیلئے 50 لاکھ روپے انعام کا اعلان

اسلام آباد (قدرت روزنامہ)وزیراعلیٰ خیبرپختونخوا علی امین گنڈاپور نے گولڈ میڈلسٹ ارشد ندیم کیلئے ذاتی حیثیت میں50 لاکھ روپے انعام کا اعلان کردیا۔
پشاور کے حیات آباد اسپورٹس کمپلیکس میں ضم اضلاع انٹر اکیڈمی گیمز کی افتتاحی تقریب میں شرکت کے دوران علی امین گنڈا پور نے کہا کہ نوجوانوں میں ٹیلنٹ ابھر کر آ رہا ہے، ارشد ندیم کو 3 دن کیلئے دعوت دیں گے کہ وہ خیبرپختونخوا آکر ہمارے کھلاڑیوں کو بھی تربیت دیں۔
تقریب سے خطاب میں وزیراعلیٰ علی امین نے کہا کہ کھیل انسان کو فٹنس اور پاور دیتا ہے، بانی پی ٹی آئی سب سے بڑے کھلاڑی ہیں جو ڈٹے ہوئے ہیں اور مقابلہ کر رہے ہیں۔
اس موقع پر وزیراعلیٰ کے پی نے ضم اضلاع انٹر اکیڈمی گیمز کے فاتح اور رنر اپ کھلاڑیوں کیلئے مجموعی طور پر 30 لاکھ روپے انعامات کا بھی اعلان کیا۔
ضم اضلاع انٹر اکیڈمی گیمز میں تین مختلف کیٹیگریز کے کھیلوں میں 400 سے زائد کھلاڑی حصہ لے رہے ہیں۔