پشین دھماکے کی مذمت، تخریب کاری کے خاتمے تک جنگ جاری رکھیں گے، وزیراعظم

اسلام آباد،کوئٹہ(قدرت روزنامہ)وزیراعظم محمد شہباز شریف نے پشین میں پولیس لائنز کے قریب دھماکے کی شدید مذمت کرتے ہوئے کم سن بچوں کے جاں بحق ہونے پر گہرے دکھ اور رنج کا اظہار کیا، انہوں نے جاں بحق بچوں کے لواحقین سے ہمدردی کا اظہار کیا۔وزیراعظم کا کہنا تھا کہ زخمی افراد کو بہترین طبی سہولیات کی فراہمی یقینی بنائی جائے، واقعے کے ذمہ داران کی نشاندہی کر کے انہیں قرار واقعی سزا دلوائی جائے، کم سن بچوں پر حملہ آور ہونے والے انسان کہلانے کے لائق نہیں۔شہباز شریف نے کہا کہ ملک سے تخریب کاری کے خاتمے تک جنگ جاری رکھیں گے۔وفاقی وزیرداخلہ محسن نقوی نے پشین میں پولیس لائنز کے قریب دھماکے کی مذمت کی اور دھماکے میں 2 بچوں کے جاں بحق ہونے پر افسوس کا اظہار کیا، محسن نقوی نے اپنے پیغام میں کہا کہ معصوم بچوں کو نشانہ بنانے والے انسان کہلانے کے حقدار نہیں، تخریب کاروں اور سہولت کاروں کے خاتمے تک یہ جنگ جاری رہے گی، یہ پاکستان کی بقا اور نئی نسلوں کو پر امن اور محفوظ پاکستان دینے کی جنگ ہے، قوم اور سکیورٹی فورسز اس جنگ میں شانہ بشانہ کھڑی ہیں۔