معروف بھارتی اداکار پر خاتون نے دبئی میں جنسی زیادتی کا الزام عائد کر دیا ، مقدمہ درج

ممبئی (قدرت روزنامہ )جنوبی بھارت کی ملیالم فلم انڈسٹری کے معروف اداکار نوین پالے پر خاتون نے الزام نے عائد کیا ہے کہ اداکار نے دبئی میں اُنہیں جنسی زیادتی کا نشانہ بنایا تھا جس کے بعد نوین کے خلاف مقدمہ درج کرلیا گیا ہے۔

بھارتی میڈیا کے مطابق 40 سالہ خاتون نے اداکار نوین پالے پر الزام لگایا ہے کہ اداکار نے ایک سال قبل دبئی میں ان کے ساتھ جنسی زیادتی کی تھی، خاتون کے الزام پر 3 ستمبر منگل کے روز اداکار کے خلاف مقدمہ درج کرلیا گیا ہے۔رپورٹ میں بتایا گیا کہ نوین پالے کے خلاف آئی پی سی کی دفعہ 376 کے تحت ایف آئی آر درج کی گئی ہے، اس ایف آئی آر میں اداکار سمیت 6 افراد کو ملزم نامزد کیا گیا ہے جن میں ایک خاتون بھی شامل ہیں۔

میڈیا رپورٹس میں یہ بھی بتایا گیا کہ نوین پالے کا نام ملیالم فلم انڈسٹری کے ان کئی اداکاروں اور ہدایتکاروں میں شامل ہے جن پر جسٹس ہیما کمیٹی کی رپورٹ کے بعد خواتین اداکاراؤں نے جنسی ہراسانی اور زیادتی کے الزامات عائد کیے ہیں۔

دوسری جانب 40 سالہ خاتون کے الزام پر ردعمل دیتے ہوئے نوین پالے نے کہا کہ مجھ پر لگائے گئے تمام الزامات بےبنیاد اور جھوٹے ہیں۔نوین پالے نے کہا کہ میں خاتون کے الزامات کو جھوٹا ثابت کرنے اور ذمہ داروں کو قانون کے دائرے میں لانے کے لیے ہر ممکن کوشش کروں گا۔