بلوچستان میں سیاسی بحران کا معاملہ: جام کمال آج وزیراعظم سے ملاقات کرینگے
ذرائع کے مطابق وزیراعلیٰ بلوچستان جام کمال خان وزیراعظم کو بلوچستان کی سیاسی صورتحال سے آگاہ کرینگے . اس سیاسی بحران سے نکلنے کےلئےحکومت نے دونوں گروپس میں صلح کروانے کی کوششیں تیز کردی ہیں . ذرائع کے مطابق وزیراعلیٰ بلوچستان جام کمال، اسپیکر عبدالقدوس بزنجواور گورنر ظہور آغا اسلام آباد میں موجود ہیں . دوسری جانب قائم قام صدر بی اے پی ظہور بلیدی، جان جمالی، سردا عبدالرحمان کھیتران سمیت دیگر بھی اسلام آباد میں موجود ہیں . ذرائع کے مطابق ملاقات میں ناراض رہنماؤں کی جانب سے تحریک عدم اعتماد جمع کرانے کے بعد کی صورتحال پر بات چیت ہوگی . ذرائع کے مطابق وزیر اعلیٰ بلوچستان نے عدم اعتماد کے تحریک کو چیلنج کرتے ہوئے سماجی رابطے کی ویب سائٹ پر اظہار خیال کیا ہے، ان کا کہنا ہےکہ الحمدللہ ہمارا اتحاد مضبوط ہے جس سے چند لوگ پریشان ہیں . وزیر اعلیٰ جام کمال کا کہنا ہےکہ اکثریت سے محروم مایوسی میں جعلی اور بے بنیاد خبریں پھیلاتے ہیں، اقتدار کی ہوس میں گھبراہٹ ، لالچ اور حسد انہیں کسی بھی غیر اخلاقی حد تک لےجا سکتا ہے . وزیر اعلیٰ بلوچستان کا کہنا ہےکہ خواہش ہے 6 وزرا اور ارکان اپنی یہ توانائی اور توجہ اپنے محکموں اور عوام پر دیتے، عوامی نیشنل پارٹی ودیگر اتحادی جماعتیں جام کمال کے ساتھ ہے . انہوں نے مزید کہا کہ صوبائی اسمبلی میں بی اے پی کی زیادہ تر اراکین صوبائی اسمبلی کی تعداد جام کمال کے ساتھ ہے . اصغرخان اچکزئی نے کہاکہ جام کمال حکومت اپنی آئینی مدت پوری کرے گا . ترجمان حکومت بلوچستان کا کہنا ہےکہ وزیراعلیٰ بلوچستان جام کمال خان کو کسی نے استعفیٰ دینے کا نہیں کہا اور نہ ہی استعفیٰ دیں گے . سوشل میڈیا پر وزیراعلیٰ کے استعفیٰ سے متعلق گردشِ کرنے والی خبریں من گھڑت اور بے بنیاد ہیں . ترجمان حکومت بلوچستان کا کہنا ہےکہ فیک نیوز پھیلانے سے اجتناب کیا جائے . . .
