فیض حمید کیا کرنے والے ہیں، فیصل واوڈا اندر کی خبر لے آئے

اسلام آباد (قدرت روزنامہ)سینیٹر فیصل واوڈا نے کہا ہے کہ پاکستان تحریک انصاف کے بانی چیئرمین و سابق وزیراعظم عمران خان اس وقت تک محفوظ ہیں جب تک وہ جیل میں ہیں لیکن رہا ہوجانے کی صورت میں ان کی زندگی کی کوئی ضمانت نہیں۔
ایک نجی ٹی وی پروگرام میں گفتگو کرتے ہوئے فیصل واوڈا نے کہا کہ عمران خان کو جیل توڑ کر نکال لینے کا دعویٰ کرنے والے اپنے لیڈر کی زندگی کی ضمانت نہیں دے سکیں گے۔
لاہور جلسہ نہیں ہوگا
فیصل واوڈا نے کہا کہ پی ٹی آئی 21 ستمبر کو اپنا جلسہ نہیں کرسکے گی۔
انہوں نے مزید کہا کہ 8 ستمبر کے اسلام آباد جلسے کے بعد ہونے والی پی ٹی آئی رہنماؤں کی گرفتاری کا وزیراعظم، اسپیکر اور آئی جی کو کچھ پتا نہیں تھا۔
فیض حمید سارا ملبہ عمران خان پر ڈالنے والے ہیں
فیصل واوڈا نے کہا کہ آئی ایس آئی کے سابق سربراہ اور کورٹ مارشل کا سامنا کرنے والے ریٹائرڈ جنرل فیض حمید سارا ملبہ عمران خان پر ڈالیں گے۔
انہوں نے کہا کہ اس حوالے سے ابھی بہت کچھ سامنے آنا باقی ہے۔ انہوں نے مزید کہا کہ مراد سعید وہ طوطا ہے جس میں 2 افراد کی جان ہے۔
علیمہ خان اپنے بھائی سے مخلص ہیں
سینیٹر فیصل واوڈا نے کہا کہ علیمہ خان اپنے بھائی کے ساتھ بہت مخلص ہیں۔ انہوں نے مزید کہا کہ پی ٹی آئی کے سارے لوگ اپنا اپنا چورن بیچ رہے ہیں۔
ان کا کہنا تھا کہ عمران خان کبھی بات سے لاعلمی ظاہر کرتے ہیں تو کبھی حمایت کرتے ہیں۔
ان کا مزید کہنا تھا کہ پہلے وزیراعلیٰ خیبرپختونخوا علی امین گنڈاپور کہتے تھے کہ کسی کا باپ عمران خان کو گرفتار نہیں کرسکتا اور اب وہ کہہ رہے ہیں کسی کا باپ ملٹری ٹرائل نہیں کرسکتا۔