آئینی ترامیم بل پاس ہونا تو دور کی بات آئندہ کسی کی جرات نہیں کہ بل پیش کرے، علی امین گنڈا پور

اسلام آباد (قدرت روزنامہ)وزیراعلیٰ خیبرپختونخوا علی امین گنڈا پور نے کہا ہے کہ آئینی ترامیم بل پاس ہونا تو دور کی بات ہے کسی کی جرات نہیں ہوگی کہ آئندہ بل پیش کرے۔
پشاور میں میڈیا سے گفتگو میں علی امین گنڈا پور نے کہا کہ آئینی ترامیم جمہوریت پر حملہ ہے اور ہم اس کو کامیاب نہیں ہونے دیں گے، انہوں نے سوچا کیسے کہ وہ جمہوریت کے ہوتے ہوئے ایسا بل لائیں گے۔ یہ جو اپنے آپ کو جمہوری پارٹیاں کہتی ہیں انہیں شرم آنی چاہیئے۔
وزیراعلیٰ خیبرپختونخوا نے کہا کہ ہم عدلیہ کے ساتھ کھڑے ہیں، ہم پارلیمنٹ میں ان کو شکست دیں گے۔ ہم اپنے جائز حق کے لیے کھڑے رہیں گے، اس طرح کا بل پاس ہونا تو دور کی بات ہے، وہ آئندہ اسمبلی میں پیش بھی نہیں کرسکتے۔
واضح رہے کہ آئینی ترامیم کا بل پاس کروانے کے لیے حکومت نے خلافِ معمول ہفتے اور اتوار کے روز بھی قومی اسمبلی اور سینیٹ کے اجلاس طلب کر رکھے تھے، لیکن ترامیم کے لیے مطلوبہ نمبرز پورے نہ ہونے پر ترامیمی بل پاس نہیں کروایا جا سکا تھا۔